Entamu Avientu’20 (Nb. 200)

Entamu

Llegamos al númberu 200 de la nuesa revista nunes circunstancies que nunca imaxináremos, pero cola firme convición de que les superaremos.

Vivimos momentos duros pal mundiu la sidre, qu’una vegada más se vio desdexáu a la so suerte, ensin recibir denguna triba d’aída nin compensación económica per parte d’un “Principado” que permanez ayenu a la problemática del seutor, dexándolu nuna situación d’indefensión que contrasta col compromisu que demostraron otros gobiernos autonómicos pal mesmu casu.

Otru tantu hai de dicir de la situación na que s’atopen los chigres, en xeneral la hostelería asturiana, cuyu preslle calteníu, la falta compensaciones xustes, y les condiciones marcaes pa la so precaria reapertura tán provocando una auténtica reconversión del seutor, que ta poniendo a prueba la so capacidá de resistencia y obligándolu a rializar braeros esfuercios y sacrificios pa caltenese y afayase a la nueva situación aniciada.

En tou casu, si daqué deprendiemos nesti andanciu tal como vien siendo xestionáu, ye a valorar lo que representen los chigres pa nós, na nuesa vida. La so importante función social, el llatíu económicu que suponen. Echemos de menos esa sorrisa, esi saludu del chigreru, esi culín bien echáu, en bona compaña, que fai que la sidre sepa entá meyor, y necesariamente punximos en valor too ello.

Poro, nestes fiestes navidiegues vamos siguir toles indicaciones sanitaries pertinentes, y por supuestu que vamos saber curiamos, pero nun vamos arrenunciar a salir. Vamos esfrutar de la nuesa sidre en sociedá, como mos presta, nos chigres, aidando a superar esi “coma inducíu” nel que los caltuvieron, y aidándomos a superar esi desamparu nel que mos dexaron.

Por supuestu, esi añu más que nunca la sidre tien que tar en toles nueses meses, la tradicional, la brut, l’axampanada, la de xelu, el llicor, l’auguardiente de sidre… de la miente que más mos preste y más lo esfrutemos, aprovechando pa conocer lo muncho que mos ufierten los nuesos llagares. Compartiéndoles y esfrutándolo con aquelles presones que queremos y apreciamos.

https://issuu.com/lasidra.net/docs/la_sidra_200