Entamu LA SIDRA 144

ENTAMU

Esplumoses brut, semiseques, dulces, de piqueñu formatu, n’elegantes botelles… les sidres de gala tán escomenzando a vivir un nueu desendolcu con interesantes apuestes pola diversificación y la calidá.

De magar la tradición de la sidre esplumoso –axampanao- que s’ellabora n’Asturies dende’l sieglu XIX, tamos abriendo camín na difícil xera de dar a conocer estos nuevos productos, n’educar a la sociedá nes sos virtúes y les sos posibilidaes de consumu, en dar puxu a la so presencia nos estantes de los comercios y nes meses de mantel.

La tradicional y enraigonada botella verde tien comu compañera a la elegante botella axampanada y el nuesu vasu de sidre convive cola estilizada copa. Agora que s’averen feches de cellebración, estes sidres de gala tienen qu’acupar el llugar preferente que se merecen nes nueses cases, colos nuesos compañeros y amigos, pa esfrutales conociendo les múltiples espresiones que presenten. Sidre, siempres sidre, con estremaes espresiones y estremaes carauterístiques, pero tan nueses comu la sidre tradicional, evolución llóxica d’un productu que caltien l’alma del nuesu país y la sencia de la nuesa tierra.

Tenemos la esperanza de qu’esti añu les alministraciones asturianes, el  “Principado” especialmente superen definitivamente la militancia antiasturiana y nes cellebraciones oficiales tea presente en primer planu la nuesa sidre, porque a estes altures nun ye de recibu’l repitíu despreciu que supon recurrir sistemática y esclusivamente al vinu español”.

De nun ser asina, apuntamos esi deseyu pal añu que vien, al llau d’un  compromisu cola declaración de la cultura asturiana de la sidre comu padrimoniu imaterial de la humanidá, que tantu prometieron y tan llueu escaecieron.

Precísase tamién una política de compromisu col Muséu de la Sidre de Nava y col seutor sidreru, tanto llagares comu collecheros y la defensa d’una normativa comunitaria pa la sidre, pa dexar de perder millones d’euros en sovenciones que sí reciben otres bébores pa la so promoción y desendolcu.

En cualsiquier casu, estes navidaes que nun falte la sidre nes nueses cases, que seya copartícipe d’allegríes y bonos deseyos; qu’acupe’l puestu que-y correspuende y que nunca tuvo de dexar d’ocupar.