Entamu LA SIDRA 183 (Marzu’19)

Entamu

Yá ta al volver la esquina la Primer Sidre l’Añu y, anque entá nun se preslló la etenra polémica sobro’l futuru de la produición de la sidre y la mazana, va ser tanta la satisfaición por esfrutar de la sidre nuevo y el resurdir de merenderos y chigres, que probablemente tornemos escaecemos del problema y quede tou ensin iguar fasta l’añu siguiente, nun ciclu permanente qu’amuesa la falta d’oxetivos nel seutor y l’ausencia de planificación per parte de les istituciones responsables, ello ye, el “Principado”.

Añu tres d’añu persistimos nos mesmos erros, y anque ye ciertu que’l seutor avanza gracies a la so puxanza y al enfotu costante de pumareros, llagareros y chigreros, lo cierto ye que lo fai con munchu sacrificiu ya inaceptables estorbises.

Fai falta un Plan Estratéxicu pa la Sidre y la Mazana, dixemoslo milenta vegaes y repitímoslo de nueu, col comencimientu de que ye daqué de sentíu común y qu’agora mesmo resulta inaplazable, especialmente pola sangría demográfica a la que se ta sometiendo a Asturies, cola consecuente perda de mercáu potencial dientru’l país. Ye urxente, y nun sedríe malo qu’aprofitando la coyuntura elleutoral, los partíos políticos lo asumiren dientru’l so programa.

Pero escomienza la primavera, y la Primera Sidre l’Añu promete ser entá más espectacular que les ediciones anteriores, el Sidracrucis d’esti añu va ser bien especialmente playu, partiendo de Cimavilla; los merenderos remanecen nes ca vegada más soleyeres xornaes, escomiencen a marcase nel calandariu les espiches tradicionales, y empecipiecen a cellebrase les primeres fiestes de prau.

Y hai más, porque nestos díis vien de nagurase una de les más importantes esposiciones sobro la sidre que se rializaron n’Asturies: “Patria de sidra”, qu’acaba nagurase en Xixón y que xunta a un total de 702 pieces mayoritariamente desconocíes o inédites que s’esponen agora per primer vegada. Nesti númberu de LA SIDRA facemos una piquena reseña, pero prometemos un trabayu más en fondura en prósimes ediciones.