Entamu LA SIDRA d’Agostu 2022 (Nb. 220)

Entamu

Esti añu llevamos una temporada sidrera como poques, cola sidre corriendo per chigres, merenderos, romeríes, d’una forma que diba tiempu que nun se vía. Asina mesmo’l mapa d’eventos sidreros non solo va n’aumentu, sinón que cunten con una perimportante rempuesta popular.

Bien especial esti mes el conceyu Carreño, con un impresionante rally de la sidre –esi que dalgunos quinxeron prohibir diciendo que se trataba d’un botellón-, y la so sardinada/sidrada en Candás, y cola degustación de sidre casero en Perlora.

Pero ye que’l Xiringüelu de Pravia tamién superó tolo imaxinable, con más de 40.000 sidreros n’aición; y la fiesta de la sidre Villa de Navia algamó niveles épicos.

Nel futuru inmediatu preséntasenos la Fiesta de la Sidre de Xixón, la de Villaviciosa, la de la Sidre en Ribeseya, los concursos de sidre casero de Ribeseya, Piloña, Mieres, Salas, y d’últimes, el XII Salón Internacional de les Sidres de Gala… munchos y magníficos compromisos a los que faer frente.

Y ye que pese al fiascu de la candidatura de la cultura asturiana de la sidre na Unesco –qu’a la fin nun foi aplazada nin refugada, sinón qu’ensiquier foi tenida en cuenta- , lo cierto ye que la sidre sigue, la vida sigue.

Sí esmolez, a los pumareros y a los llagareros especialmente, pero en rialidá a tolos amantes de la sidre, la poca mazana que se ve nos pumares… da la impresión de qu’esti añu va precisase muncha mazana de fora p’atender la demanda. Ye una pena y resulta incomprensible qu’esistiendo una demanda interior que nun se consigue cubrir, nun se tomen les midíes precises pa ello.

Una vegada más tenemos qu’echar en falta la esistencia d’un Plan Estratéxicu para la Sidre y la Mazana, que permita conocer cuala ye la demanda rial, la ufierta esistente, les posibilidaes de desendolcu, les llínies d’inversión, los criterios, la cuantía y distribuición, pa poder evaluar resultaos y solucionar definitivamente esti problema.

Llamentablemente, magar delles declaraciones n’esi sen de los políticos responsables, nun paez que’l ‘Principado’ tea previsto denguna actuación nun futuru prósimu.

En tou casu, y como dicíemos enantes, la sidre sigue, la vida sigue.