Entamu LA SIDRA d’Avientu’22 (Nb.224)

Entamu

Curiosamente foi una iniciativa presonal, la de cobrar a preciu distintu la sidre sigún s’eche por un profesional o non, la que ta protagonizando’l panorama sidreru d’esti mes, dexando n’evidencia la esistencia de dos custiones fundamentales del seutor: el trabayu –y la remuneración- del echaor y el mesmu conceutu de sidrería.

¿Tienen de tener una considerancia llaboral específica los echaores de sidre? ¿Pue una sidrería nun cuntar con echaor? Ye importante centrar l’alderique y nun cayer no aneudótico, porque en rialidá de lo que se trata ye de la necesidá –o non- de cuntar con una categoría llaboral propia pa estos profesionales, y de la comeniencia de que’l conceutu de sidrería defínase llegalmente ya incluya –o non- la desixencia de cuntar con estos profesionales pa poder considerase como tala.

N’otru orde de coses son estes unes feches bien especiales pa les sidres ‘de Gala’, cuyu consumu espoxiga enforma nos ágapes navidiegos. Aprovechemos esta ocasión pa reivindicales, y consiguir que reinen en toles meses asturianes, por consumu identitariu, por kilómetru ceru, y, cómo non, pola calidá y versatilidá del productu.

N’esi sen, dende yá y demientres toes estes festividaes, podemos esfrutar de ‘Asturies Sidre Brut’, un eventu que mos propón 150 establecimientos nos que poder degustar esti productu acoyíu a la DOP Sidre d’Asturies. Una oportunidá única que debiéremos d’aprovechar como se merez.

Pero hai más, la DOP Sidre d’ Asturies vien de ser premiada na XV edición de los Premios de Marketing d’Asturies pola so campaña ‘Escáncia-lo’. Fáense les coses bien.

Asina mesmo, paez que por fin tán dándose los pasos por que’l Muséu de la Sidre d’Asturies, en Nava, contrate a un direutor que planie y desendolque un plan d’actuación pal mesmu. Fai falta.

Entá más, dempués del XII Salón Internacional de les Sidres de Gala, les sidres asturianes siguen recibiendo reconocencies nos eventos internacionales. Bien.

Y yá a lo cabero, pa los clásicos de la sidra natural, recordar qu’en Xixón siguen cellebrándose los ‘Xueves de Sidre’, DOP+cazuelina a precios interesantes, una iniciativa que tuviera d’estendese pel restu’l país.

Mui sidreru y feliz añu nuevu.