Entamu Xineru’21 (Nb.201)

Entamu

Escomenzamos un nuevu añu onde los problemes non solo siguen, sinón que paecen amontase, y onde l’actualidá que marca l’andanciu complícase muncho más por una xestión de la mesma, qu’a lo menos habría que calificar d’errática y que en llugar de reforzar la Sanidá Pública Asturiana con más UCIS, más presonal sanitariu y más medios para fae-y frente, llimítase a a aumentar les restriciones a l’actividá hostelera, ensin les pertinentes compensaciones o aídes.

Pesia l’evidente compromisu del seutor hosteleru nel cumplimientu coles midíes sanitaries na so actividá, lo cierto ye que se-y ta criminalizando de forma inxustificao, quiciabes col únicu oxetu de tapecer incapacidaes y arbitrariedaes. Seya como fora, lo cierto ye que les polítiques del “Principado” nesti sen, caltienen al conxuntu del seutor n’una situación d’inestabilidá dafechu, y a la sociedá asturiana nun estáu de rocea qu’en ná la favorez.

Les sidreríes, por supuestu, sufren esta situación de forma claro, y son munches les que caltienen la so actividá más por puru compromisu colos sos veceros que pola necesaria viabilidá económica; el so esfuerzu ye inxente, y el so enfotu entá mayor.

Ye por elles poles que, magar les evidentes dificultaes materiales qu’ello supón, la revista LA SIDRA ta de nuevu equí, porque igual que toviemos presentes nos momentos bonos, nun queremos dexar de talo nos malos, porque debémosmos al seutor, y ye la nuesa forma de sofitalos y agradece-yos el so valor.

Pero non tou son aspeutos negativos, hai que destacar que nestes pasaes fiestes la presencia de la sidre nos llares asturianos foi enforma mayor y más variada que n’ocasiones anteriores, marcando un enclín que diz enforma del compromisu de la sociedá asturiana cola so bébora patrio. Magar les dificultaes, la campaña de la DOP Sidre d’Asturies dando puxu a la sidre brut resultó un ésitu y l’anunciu de la nueva iniciativa “Sidreturismu Asturies” ye toa una esperanza pal seutor, una iniciativa que se vería bien reforzada de consiguise que d’una vegada el “Principado” sacara allantre la declaración pola Unesco de la cultura asturiana de la sidre como padremuñu inmaterial de la humanidá.

https://issuu.com/lasidra.net/docs/la_sidra_201