La Xunión Europea analiza la definición de Sidre

Desamina les posibles ventaxes d’afitar una definicion armonizada de lo que ye “Sidre”, a nivel européu

LA SIDRA.- Talo como venimos denunciando va años dende estes páxines   y en toes y cauna de les ediciones del Salón Internacional de les Sidres de Gala, , la falta d’una normativa común europea respeutu a la sidre caltiénmos nuna situación discriminatoria respeutu a otres bébores como’l vinu, torgando la posibilidá d’algamar recursos económicos, aídes y sovenciones que sí que tan a dimposición de productores d’otres bébores.

Agora mesmo, la Xunión Europea vien de llanzar un estudiu d’evaluación sobro los estándares de comercialización na actual regulación de la Organización Común de Mercado y nel analís de les “Direutives d’Almuerzu” -Breakfast Directives-  qu’afiten normes sobro descripción, definición, carauterístiques y etiquetáu d’una riestra de productos agrícoles y alimenticios que se consumen davezu pal almuerzu –ensin comentarios- inclúi nel so apartáu VI el “Desamine de les posibles ventaxes rellacionaes sobro l’afitamientu d’una definición armonizada de sidre a nivel de la Xunión Europea”

La evaluación tien como oxetivu evaluar la efeutividá, eficiencia, rellevancia, consistencia y valor agregáu européu de los estándares de comercialización afitaos pol Reglamentu (XE) nb. 1308/2013 pola llexislación secundaria de la OCM y poles Direutives d’Almuerzu, de tala miente que permita que’l mercáu se suministre fácilmente con productos de calidá estandarizada y satisfactoria, refiriéndose a definiciones téuniques, clasificación, presentación, marcáu y etiquetáu,e mbalaxe, métodu de produición, conservación, almacenamientu,t resporte, documentos alministrativos rellacionaos, certificación y pazos, restriciones d’usu y eliminación.

Fasta onde sabemos ye la primer vegada que la XE entra a valorar la situación de la sidre, con toles implicaciones qu’ello acarreta, y sedríe d’esperar que tantu’l “Principado” como los eurodiputaos asturianos tovieren sollertes ya intervinieren pa consiguir avanzar nesti campu.

Fasta agora namás la organización nacionaliega Andecha Astur, al traviés del so eurodiputáu d’Europa de los Pueblos,  llevó alantre iniciatives na Xunión Europea pa que la sidre en xeneral, y l’asturiana en concreto gociara de la debía reconocencia a nivel européu y s’avanzara nuna normativa común europea al respeutu.