El Salón Internacional de les Sidres de Gala (SISGA) cellebra mañana, sábadu 27 de setiembre, la so gran Preba Abierta al Públicu, una cita imprescindible pa los amantes de la sidre. L’eventu va desenvolvese nel Pabellón de Congresos de la Feria Internacional de Muestres d’Asturies, en horariu de 12 a 15 y de 17 a 20 hores.
Nesta edición, 236 variedaes de sidre procedentes de 63 llagares de 18 países van tar a disposición de los visitantes. Por namái diez euros la entrada, el públicu podrá esfrutar d’una esperiencia única: tastiar delles de les meyores sidres del mundu, falar directamente colos sos ellaboradores ya inclusive mercar dalgún productu nel mesmu recintu.
L’oferta ye bien amplia y diversa: sidres brut, espumoses, de mesa, de xelu, de fueu, aromatizaes, en licor, vermú o aguardiente, ente otres. A lo llargo de la xornada, amás de la esposición y la degustación, van celebrase presentaciones a cargu de los propios productores, que non solo van destacar les carauterístiques organoléptiques de les sos sidres, sinón que tamién van compartir la filosofía de los sos llagares y los métodos d’ellaboración. Estes cates van tar acompañaes de productos de Alimentos del Paraísu, poniendo en valor al empar la calidá de los mesmos y la versatilidá de la sidre como maridaxe gastronómicu de primer nivel.
D’ente les presentaciones d’esti añu destaquen la Sidre de Xelu Valverán (Asturies), Fukiware Cidre (Xapón), Sidres Baldorba (Navarra), Abuls (Letonia), Patagonia Astigarraga (Arxentina) y Ottercidre (Bélxica).
Como novedá, y coincidiendo cola feria Agropec, tolos visitantes d’esta van recibir un val de degustación pa prebar una sidre internacional.
Mentanto, güei celébrase la xunta del xuráu de los prestixosos Premios SISGA, de magar les 9:30 nel restorán Finca El Duque. La singularidá d’esti concursu ta na so ecuanimidá, yá que ca llagar participante cuenta con un representante nel xuráu, lo que garante una valoración xusta y diversa de los productos presentaos.
