Sidre asgaya

La collechona de mazana trai como resultáu un escedente de sidre.

LA SIDRA.- Dempués de los problemes derivaos pol escesu de mazana, llega otra dificultá: sacar al mercáu la cantidá de sidre producío nos llagares asturianos.

La mayoría acaben de pesllar la temporada de mayáu y confíen en que’l consumu de sidre, que s’enllancó nos tiempos caberos, xorreza y puean dar salida a tola sidre ellaborao de más.

Lo que sí ye cierto ye que la nueva sidre va venir con menos alcol por efeutu de les condiciones climatolóxiques d’esti añu: la escasez de sol y augua provoca que les mazanes, especialmente les races más tempranes, contengan menos zucres.

Jose María Díaz, de Sidre San Juan del Obispo, en Tiñana, reconoz que, como la mayoría de los llagares, producióse muncha más sidre esti añu, cuasique’l  doblu que l’añu pasáu, anque-y dieron salida al traviés de destilaos y otros derivaos.

Pela so parte, Fernando Morán, de Sidre Viuda de Corsino, en Nava, remarca que tola mazana cola qu’ellabora la so sidre ye 100% asturiana y confía en que la xente anímese a consumila.

Manuel Riestra, de Sidre Muñiz, Tiñana, confirma qu’ésta foi una bona campaña, anque la bayura de fruta nun suel ser proporcional a la calidá.

Y José Palaciu, de Sidra Viuda de Palaciu, en Fozana, considera qu’agora que la sidre ta nos llagares, hai qu’aumentar les vientes.

Tino Cortina, presidente del Conseyu Regulador de la DOP Sidre d’Asturies aportuna n’encetar la tema del control de les colleches de forma conxunta, yá que tarrez que l’añu que vien recuéyase namá’l 20% de la fruta d’esti añu, y precísase un suministru mínimu para evitar trayer mazana de fora.