VIII Asturianada y Sidre

“A mio pa y a mio tíu prestába-yos muncho canciar, y mio pa, siempres que los domingos poníen la canción asturiana pela nuechi, sentábame con elli nel sofa. Y decíame: “¿pero cómo ye que te gusta esto?” y yó retrucába-y: “pues encanciame”. Entós, debaxo casa escomenzamos a dir a un chigre onde conociemos a Ismael y emprencipié a dir llueu a les sos clases”

LA SIDRA.- L’Ismael al que se refier ye’l míticu Ismael Tomás, profesor d’una de les escueles de música tradicional, la de La Quintana de Xixón “Ye la nuesa cultura. La sidre ta mui xunía a los bolos, a los xuegos tradicionales y por supuestu a la canción asturiana. Tamos percontentos de qu’agora hebia una cantera de piqueños cantantes que ponen mui n’alto los nueso valores. Son sobro too neñes, les muyeres son más echaes p’alantre nesti aspeutu, por eso tamién queremos que s’animen neños. Dizse que la tonada nun tien munchu públicu, y nun ye asina, porque aú vamos, siempres ta atarraquitao” dixo Tomás pa esta revista.

Noemí Alonso y Laura Uría tamién demostraron les sos dotes, y vaya d’aplausos que tovieron. “Yo dende piqueña cancio y préstame muncho” diz la primera, la segunda fina: “Dende los cinco años escomencé a cantar, de too, y agora colo qu’esfruto ye de la tonada”. Al otru díi tocó’l turnu a los alunos de la Escuela Tradicional Manolo Quirós d’Uviéu. Anabel Santiago desplicó: “Hai una montonera de xente mozo que lleva unos años saliendo, na escuela onde toi como profesora, ca begada noto qu’hai más matriculaciones de neños y adolescentes que tan destacando muncho. Gracies a los medios de comunicación les presones tan averándose más a la tonada, entós hai un resurdir”.