¿Una ruta? El Senderu Llocal de Nava ¿Una terraza? La Naveta

La ‘sidroteca’ ye un de los llugares más allegaos de la villa, más agora que podemos aprofitar la so soleyera orientación

LA SIDRA.- La cris del coronavirus provocó que, nes más de les ocasiones, optemos pola consumición en terraces. Vamos ver, d’alcuerdu qu’esto nun ye propiu de les midíes de seguranza, col bon tiempu ye llóxico que queramos pasar el nuesu tiempu d’ociu al campu. ¡Lo que mos presta tomar el sol para la vitamina D! Sicasí, lo que sí ta provocando esta cris sociosanitario ye qu’andemos a la gueta de más actividaes turístiques d’interior. Nos postreros meses faer senderismu dientru del propiu país amontóse. Ye una de les actividaes más segures, que puen rializase con pareya, amigos o tola familia; y qu’amás vienmos bien dempués d’un llargu confinamientu. ¿Y hai daqué meyor que dempués de caminar, de xubir y  baxar, podamos sentamos n’un los fantásticos llocales que tenemos n’Asturies para tomar daqué?

Por eso dende equí encamentamosvos un planazu de fin de selmana. Nava ye un conceyu preciosu, que sospriende a quien nun lo visitó con anterioridá. Si queremos caminar un pocu, podemos percorrer el llamáu ‘Senderu llocal de Nava’. Ruta circular de siete kilómetros con un desnivel de 150 metros nel que les vistes son precioses.

Y cuando lleguemos de nueu a la villa, la sidroteca La Naveta ye una estupenda opción. Equí atopamos sidres de toles partes del mundu, pero non sidre natural, ello ye, non de sidre d’echar. Na so ufierta ponen a dimposición sidres esplumoses, semiseques, afrutiaes, con saborgos, de botellín, de llata, de xelu, de nueva espresión… L’abanicu ye imensu. Amás de que tamién tienen produición propia: La Naveta Roxa y la Naveta Brut, bien premiaes en’estremaos certames del país. Pa tastiales, Ana y Ricardo recíbenmos n’una amplia terraza soleyera, que cunta tamién con zones cubiertes, pa pasar una más que prestosa tardi o nuechi. La música ye otru aciertu.