La reconocencia de la Cultura Asturiana de la Sidra como Patrimoniu Cultural Inmaterial de la Humanidá sigue abriendo nueves oportunidaes pa la proyeición exterior d’Asturies. Un añu dempués de la declaración de la UNESCO, el sector cultural, turísticu y sidreru coincide en señalar que la sidra ye güei unu de los principales emblemes del país de cara al exterior.
Fiestes, festivales, visites a llagares, rutes temátiques y actividaes gastronómiques siguen atrayendo cada vegada más interés ente visitantes que busquen esperiencies venceyaes al paisaxe, la tradición y la identidá asturiana. La sidra convirtióse nun elementu clave pa promocionar un modelu turísticu de calidá, venceyáu al territoriu y respetuosu col patrimoniu cultural.
La publicación ¿Qué ye la Cultura Asturiana de la Sidra?, presentada pola Fundación Asturies XXI, recueye precisamente esi potencial del mundu sidreru como ferramienta de promoción internacional y como elementu d’orguyu colectivu. La espublización cunta col sofitu de la Conseyería de Cultura, Política Llingüística y Deporte.
Dende les pumarades hasta los chigres, pasando polos concursos d’escanciadores o les espiches tradicionales, la sidra ufierta una imaxe auténtica d’Asturies que conecta con públicos bien diversos.
Instituciones y profesionales del sector consideren que’l momentu actual tien de sirvir pa consolidar esa presencia internacional y siguir xenerando actividá económica, emplegu y prestíu cultural alredor d’un patrimoniu únicu. La sidra, más que nunca, sigue siendo una embaxadora d’Asturies nel mundu.
