El llagar de Piñera foi l’escenariu escoyíu pa la presentación del proyectu CIDEREU, una iniciativa que marca un enantes y un dempués pal sector de la sidre, non solo n’Asturies sinón tamién a nivel européu
LA SIDRA – Na presentación anuncióse’l respaldu y la financiación por parte de la Xunión Europea al proyectu CIDEREU, cuya aprobación definitiva pola Asamblea Europea vien de firmase. Esti fechu foi calificáu como “un gran fitu” por Jorge González Palacios, conceyal de Rellaciones Institucionales del Conceyu de Xixón, quien abrió l’actu con pallabres d’entusiasmu.
La inversión total, financiada pola Xunión Europea, asciende a 253.000 euros, destinaos a revalorizar la cultura sidrera y l’agricultura tradicional como motores d’identidá, caltenibilidá y cohesión social. Demientres el programa, que va desendolcase ente 2026 y 2027, celebraránse tres grandes eventos europeos, siendo’l principal en Xixón.
Na so intervención, Marcos Abel Fernández, presidente de la Fundación Asturies XXI, repasó’l llargu percorríu hasta esti momentu, dende los primeros alcuentros internacionales cellebraos dientru’l Salón Internacional de les Sidres de Gala, hai yá quince años, onde se detectaron les semeyances ente los sectores sidreros europeos, fasta l’aniciu de Cider Cities en 2023. “Comprobemos qu’esistía una problemática común, tanto na ellaboración de sidre como na producción de mazana y na esistencia d’una cultura, más o menos desendolcada, al rodiu la sidre”, señaló.
Fernández destacó amás el sofitu constante del Conceyu de Xixón, la Fundación Rural Xixón y la Cámara Comerciu de Xixón, socios fundadores xunto cola Fundación Asturies XXI, al rodiu de los cualos fueron sumándose otros conceyos europeos. La rede Cider Cities agrupa fasta’l momentu a diez conceyos: Xixón, Nava, Cangues, Kuartango (Álava), Valleseco (Gran Canaria), Chelcicko-Lhenický (República Checa), Saint-Marcel (Italia), Urrugne (Francia), Carrazeda de Ansiaes (Portugal) y Celje (Eslovenia).
Ente los oxetivos del programa tán promover la igualdá de xéneru, impulsar la participación ciudadana y xuvenil, fomentar la caltenibilidá y la economía circular, y educar sobro’l valor del padremuñu popular ya’l mediu ambiente.
Acullá de la inversión económica, l’aprobación de CIDEREU supón el reconocimientu de la cultura de la mazana y la sidre como parte esencial del padremuñu européu, siendo la primer vegada que la XE financia un proyeutu centrándose nesti ámbitu. Fernández subrayó’l papel de llideralgu de Xixón como referente sidreru européu: “Ábrensemos les puertes de la Xunión Europea; fasta agora nun esistía na”, afirmó, destacando los sofitos históricos que reciben otros sectores como’l del vinu o la cerveza.
Pela so parte, el presidente de la Fundación Rural Xixón, José Ramón Fiaño, amosó l’orgullu de la so entidá por haber participáu dende los entamos: “Ye una manera de defender y protexer el padremuñu cultural non solo de Xixón, sinón d’una cultura que nos xune como persones y como ciudaes”.
En representación de la Cámara Comerciu de Xixón, el so secretariu xeneral, Álvaro Alonso Ordaz, señaló que “la Cámara, como representante del texíu empresarial de Xixón, nun podía dexar de tar presente, sofitar y impulsar un proyeutu d’estes carauterístiques”. Destacó que la aprobación de CIDEREU ye “el colofón a los esfuercios fechos y el pistolezazu de salida pa materializalos al rodiu la sidre, asitiando a Asturies y a Xixón nel centru del proyeutu”, recordando tamién la importancia del sector empresarial que sofita la cultura sidrera.
L’actu zarróse cola intervención de Jesús Martínez Salvador, conceyal d’Urbanismu, segundu teniente d’alcaldesa y voceru del Gobiernu del Conceyu de Xixón, quien destacó que “ye un día mui importante pal sector sidreru, pa Xixón y p’Asturies. Supón un pasu xigante pa la so consolidación y xorrecimientu, la confirmación del trabayu bien fechu y la garantía de que la fueya ruta trazada ye la correcha. Ye un impulsu y una motivación pa siguir sumando”.
Al actu asistieron, amás de los representantes de les entidaes fundadores y del Conceyu de Xixón, representantes políticos d’otres ciudaes implicaes nel proyectu, con presencia institucional de Nava, Cangues, Chelcicko Lhenicky y Villaviciosa, esta cabera en procesu d’incorporase a la Rede Europea de Ciudaes de la Sidre. Xunto a ellos tamién participaron numerosos hosteleros, llagareros y personalidaes vinculaes al mundiu la sidre.
