La Primer Sidre del Añu culminó ayeri la so primer xornada con escelentes cifres de participación y destacando pol bon ambiente.Los organizadores destaquen que, añu tres añu, vese cómo la xente cada vegada s’interesa más por saber de sidre: “les tasties guiaes enllenáronse toes, con xente mirando dende fuera, y na barra yeren mayoría los que queríen probar una u otra marca n’específico, comparando y valorando la sidre y demostrando’l conocimientu ya interés que tenemos los asturianos”.
Ayeri, a la una del mediudía, abría les sos puertes la decimosexta edición de la Primer Sidre l’Añu nel recintu ferial Lluis Adaro (Feria de Muestres).
El pregón d’esti añu foi mui especial, cola participación de la Plataforma contra la contaminación de Xixón y l’Asociación Vecinal La Calzada Alfonso Camín, coles sos camisetes de “la sidrina nun contamina”. Ambes asociaciones dexaron bien clara la importancia d’un mediu ambiente llibre de contaminación y la necesidá de que les autoridaes actúen pa controlar esti problema, qu’afeuta con especial intensidá a los vecinos de la zona oeste, pero que perxudica a tol conceyu.
L’actu siguió cola entrega de los premios que reconocen la Meyor Primer Sidre l’Añu de 2026, final que tuvo llugar el miércoles pasáu en La Montera Picona, col llagar avilesín Germán como ganador, polo que ye la sidre oficial d’esti añu. En segundu puestu quedó Contrueces (Xixón) y en terceru, La Morena (Siero). Entregaron los premios Manuel Busto, presidente del xuráu, y Begoña López, directora xeneral d’Agroalimentación.
Alejandra Vanegas, de La Montera Picona, echó’l culín inaugural, al que siguió otru colectivu cola Buena Cofradía de los Siceratores de Asturias, premiaos y autoridaes, mientres que la barra, con decenes de palos diferentes, entamó a recibir a los primeros visitantes.
L’arribación de públicu foi constante dende primer hora, esfrutando de los actos y de la barra de sidre, pero sobremanera de la zona esterior, onde los toneles de llibre y la música nun pararon en tol día.
A lo llargo del día nun pararon tampocu les actividaes complementaries: tastia de sidres vasques y alemanes, amás de la de les tres ganadores del certame; prebes de choscu de Tinéu, galletines de mazana o quesu de La Peral; una prestosa clase d’echar sidre a cargu los echadores de La Montera Picona de Ramón; y como ramu, l’apoteósicu conciertu d’Ún de Grau, que punxo a cantar al públicu col so repertoriu de cancios de chigre.
Mientres se desendolcaben les actividaes pa adultos, los neños entamaron tamién el so programa, ellaborando un paxu en directu, xugando a xuegos de los de tola vida y mayando una bona llagarada de sidre.
La hora de peslle llegó casi por sorpresa, dexando a toos con ganes de más —más sidre, más baille, más xuegos, más música—, pero afortunadamente inda queda tiempu hasta’l domingu. Ensin escaecer que güei se cellebra peles cais de Xixón y Avilés el Sidracrucis, la procesión más sidrera.
Programa
Vienres 3
12:00 – Apertura
14:30 – Esterior
• Recepción Sidracrucis
15:00 – Espaciu Unesco
• Tastia de sidres ganadores
• Degustación de quesu afumiáu de Pría
16:00 – Espaciu Unesco
• Presentación del llibru Llagares caseros con firma de llibros de l’autora, Susana Sela
17:00 – Espaciu Unesco
• Tastia de sidres de la Macaronesia
Degustación de Choscu de Tinéu
17:00 – Esterior
• Mayada infantil
19:00 – Escenariu
• Actuación: Soi Panderetera
21:00 – Preslle
