Preslla otra edición de la Primer Sidre l’Añu cola satisfacción de cumplir, una vegada más, los oxetivos marcaos: vivir la Cultura Asturiana de la Sidre como nos presta, compartila con tolos que s’averaron y construyir, ente toos, una auténtica folixa alredor de lo nueso.
Tres cuatro intensos díes nos que la sidre foi la gran protagonista, la organización del eventu, a cargu de la Fundación Asturies XXI, amuésase plenamente satisfecha col desendolcu de la cita. Caltuviéronse les cifres del añu pasáu, con alredor de 10.000 asistentes, consolidando asina la Primer Sidre l’Añu como una de les grandes celebraciones culturales y gastronómiques del calendariu asturianu.
La sidre volvió correr con xenerosidá, hasta’l puntu de que foi necesario reponer esistencies procedentes de dellos llagares. Les tasties y degustaciones de productos asturianos enllenaron en toles sos sesiones, quedando incluso xente fuera, interesada en siguir l’actividá. Mentanto, los más pequeños tuvieron el so propiu protagonismu, mayando y esfrutando de miles de llitros de sidre dulce, nuna esperiencia que combina tradición, deprendizaxe y diversión.
L’ambiente folixeru dexóse sentir en cada rincón del recintu: hebio música, baille, cancios, xuegos tradicionales, como les carreres de sacos o’l tiru cuerda, y tampocu faltaron clásicos como la cuatriada, la rana o la llave. Tou ello nun entornu seguru, ensin incidencies reseñables, daqué que vuelve ser una constante na trayeutoria de la Primer Sidre l’Añu dende los sos anicios y qu’espeya l’espíritu col que’l públicu acude: esfrutar con responsabilidá y celebrar lo propio. Nun en balde, son munchos los asistentes fieles que repiten añu tres añu, ensin perdese denguna edición.
Nel apartáu de concursos, Nerea Valledor algamó’l reconocimientu a la meyor escanciadora amateur, entantu que’l premiu a la Meyor Sidre Casero Fecho en Maera foi pa Marcos Rodríguez, de Salas, poniendo en valor el trabayu y la dedicación de quien caltienen viva la tradición sidrera dende l’ámbitu domésticu.
Dende la organización tamién destaquen el xorreciente interés y conocimientu del públicu en redol a la sidre. Cada vegada son más les persones que s’averan a la barra de la Primer Sidre l’Añu con criteriu, sabiendo qué palos quieren probar y compartiendo impresiones sobre les sidres que tán bebiendo. L’éxitu de les tasties guíaes ye tamién un indicador d’esti interés: nun entornu nel que se podía beber tola sidre que se quixera, cientos de persones prefirieron recibir una esplicación detallada de cómo saborguiar, valorar y apreciar al máximu les cualidaes organoléptiques de la mesma, ampliando amás el so conocimientu xeográficu del productu al traviés de sidres d’otros países.
Tamién se valora mui positivamente la participación de families con menores, un aspeutu nel que la organización pon especial enfotu al traviés d’actividaes orientaes a los más pequeños. D’esta manera, cientos de neños y neñes van averándose cada añu a la cultura sidrera dende’l xuegu y la esperiencia, entendiendo que la sidre ye muncho más qu’una bébora: ye tradición, identidá y patrimoniu.
En resume, la Primer Sidre l’Añu vuelve a presllar puertes con ésitu, medrando en participación, en calidá y en proyección, y reafitándose como una cita imprescindible pa entender y celebrar la cultura asturiana de la sidre. L’añu que vien, más y meyor.
