La delegación asturiana vivió güei una de les sos xornaes más intenses nel Festival Intercélticu d’An Oriant, con una programación na que la música tradicional y folk ocupó un llugar destacáu nos distintos escenarios del certame. Les actuaciones de los artistes del Principáu volvieron atraer a un públicu bien numberosu, confirmando l’interés que la cultura asturiana despierta cada añu na gran cita intercéltica.
La representación asturiana ta formada nesta edición por nomes como Alienda, Bada & Muñalén, Eva Tejedor y Les Pandereteres, Guieldu, Marisa Valle Roso, Pablo Carrera, Rubén Bada, La Reina del Truébanu y la Banda de Gaites San Félix de Candás, que van desenvolviendo una intensa programación d’actuaciones y alcuentros culturales a lo llargo del festival. Estes propuestes amuesen la diversidá de la música asturiana, dende la tradición oral hasta les nueves interpretaciones del folk contemporaneu.
Amás de los conciertos, los músicos asturianos tán participando en actuaciones de cai y espacios compartíos con artistes procedentes de Bretaña, Escocia, Irlanda, Galicia y Gales. Esti intercambiu ye una de les señes d’identidá del Festival Intercélticu, onde les distintes cultures celtes conviven y compartan escenarios, repertorios y esperiencies.
La presencia d’Asturies nun se llinda al ámbitu musical. Nel espaciu institucional del Principáu siguen desenvolviéndose actividaes de promoción turística y gastronómica, con especial protagonismu pa la cultura sidrera y los productos identificaos cola marca Alimentos del Paraísu Natural, que tán teniendo una bona acoyida ente los visitantes del festival.
Tres los primeros díes de programación, la impresión xeneral ye que la participación asturiana vuelve consolidase como una de les más actives del festival. La calidá de les actuaciones y la bona respuesta del públicu refuercen el papel d’An Oriant como unu de los principales escaparates internacionales pa la música y la cultura d’Asturies.
La programación va continuar nos próximos díes con nueves actuaciones, actividaes institucionales y la preparación del gran desfile intercélticu, unu de los momentos más esperaos d’una edición que vuelve convertir An Oriant na capital de les cultures celtes d’Europa.
