Yá ta na cai la revista LA SIDRA d’ochobre de 2026, con 98 páxines dedicaes al SISGA, al futuru de les sidreríes y a una cultura que se tresmite nes escueles, nos pueblos y na emigración.
Recibi gratis la revista en PDF per WhatsApp
Pa recibir gratis el PDF de la revista LA SIDRA, namás tienes qu’apuntate al WhatsApp de LA SIDRA. Manda un mensaxe al 652 594 983 poniendo ES si quies recibir información n’español o AS si la prefieres n’asturianu.
LA SIDRA.- El númberu 270 de LA SIDRA llega cola semeya de familia de los Premios SISGA en portada, obra de Llucía Fernández. La nueva edición combina un ampliu percorríu pol alcuentru internacional celebráu en Xixón con reportaxes, opinión, fotografía y propuestes gastronómiques. Una mirada al presente de la sidre y a les persones que-y dan continuidá.
El SISGA’26, nel centru de la revista
El bloque principal repasa la decimosexta edición del Salón Internacional de les Sidres de Gala, celebrada del 24 al 27 de setiembre, con 346 productos de 124 llagares de 35 países. Les páxines siguen el percorríu de les delegaciones, dende la inauguración y les actividaes nel Muséu de la Sidre de Nava hasta les visites a El Gaitero y Sidra Cortina.
La xornada de tastia abierta, l’asamblea de Cider Cities, la espicha de xermandía en Piñera y el Brunch de Gala completen una cobertura que recueye tamién los Premios SISGA 2026 y dedica espaciu a dellos de los llagares y productos participantes. La incorporación de Madeira y A Estrada a Cider Cities amuesa la continuidá del trabayu compartíu ente territorios sidreros.
Dar futuru a les sidreríes y tresmitir la cultura
L’editorial, «Dar futuru a la fuercia de la sidre», plantea la necesidá de convertir la proyección internacional y la reconocencia cultural n’oportunidaes duraderes pal sector. Nesa mesma llinia, el reportaxe sobre un estatutu fiscal pa protexer la sidrería asturiana abre’l debate sobre’l sofitu que precisen los establecimientos que caltienen vivos el serviciu de la sidre y los sos vezos.
La formación y el relevu tienen tamién un llugar destacáu, cola Escuela de Escanciadores Tierra Astur y la vuelta de los Sidrocoles a les aules. La propuesta educativa de la Fundación Asturies XXI avera la mazana, la mayada, la pumarada y el vocabulariu del llagar al alumnáu al traviés de la participación y la memoria familiar.
Semeyes, emigración y vida sidrera nos conceyos
«La sidre que cruzó l’Atlánticu» recupera la rellación ente emigración ya identidá al traviés del proyeutu La sidre na emigración asturiana, con llibru, esposición virtual y muestra itinerante. Les imáxenes y documentos permiten conocer cómo la sidre acompañó a les comunidaes asturianes n’América.
La revista publica amás el fallu del XVIII Concursu Internacional de Semeyes LA SIDRA, que concedió’l primer premiu a Josemi Díez por «Nicolás». El xuráu valoró 120 semeyes de 37 autores. Les cróniques de Morea, la Folixa la Sidre y los concursos de sidre casero de Gozón y la cuenca del Nalón completen esta mirada a la participación popular.
Gastronomía pa siguir descubriendo la sidre
El númberu d’ochobre dedica espaciu a «12 meses, 12 sabores», la iniciativa gastronómica de Grupo Codilex y LA SIDRA, y a les propuestes de sidreríes y establecimientos del país. Inclúi tamién l’artículu de Manuel G. Busto «¿Por qué la sidra tiene que saber a manzana?» y información sobre la incorporación de la sidre de xelu a la DOP Sidra d’Asturies.
Actualidá, cultura, gastronomía y debate comparten asina les 98 páxines d’una edición que mira al mundu dende los llagares, les sidreríes y la vida cotidiana d’Asturies.
Diseñu promocional xeneráu con IA a partir de la portada de LA SIDRA 270. Semeya de portada: Llucía Fernández / LA SIDRA.
