La sidre entra fuerte en Madrid Fusión y Enofusión

La sidre asturiano entró con fuercia en tolos espacios de Madrid Fusión y Enofusión.

LA SIDRA.- Yá dende’l primer momentu, un espositor de Xixón de Sidre recibió con un culín de Trabanco a tolos asistentes al eventu más importante de la gastronomía española. Cristian Wilkin Aquiles, segundu puestu nel Campionatu Oficial d’Echaores de Asturies, ye’l echaor nesti stand pol que pasaron presonalidaes del mundiu la política, gastronomía y l’espetuáculu, comu la presidenta del PP madrilanu Esperanza Aguirre, el baloncestista Fernando Romay o l’es concursante de Top Chef Javier Peña. Y eso namás nel recibidor del Palaciu de Congresos de Madrid.

Na segunda planta, yá adientrándomos nel universu d’Enofusión, la DOP Sidre d’Asturies foi emponderada por demás. Los asistentes al eventu pudieron tastiar marques comu Val d’Ornon natural DOP, Poma Áurea brut DOP, Villacubera natural DOP, Pomarina Brut DOP o la sidre d’Emilio Martínez.

“Foimos perbién, tamos sosprendíos de lafluyencia que toviemos” siñala Reyes Ceñal, xerente del Conseyu Regulador. Demostrando’l so interés nesti productu y dando les sos impresiones a Ceñal sobro’l mesmu, tevo la sumiller Montse Valije. “Ye una bébora gastronómica dafechu, convida a comer. Ye sosprendente lo qu’abre en boca” dixo la esperta sobro la sidre d’autor Emilio Martínez.

Ensin dulda una de les tasties más risonderes y sorprendentes d’esti llunes foi la entamada por El Gaiteru na tercer andar del palaciu. La so sidre brut, Pomarina, foi la protagonista d’una tastia d’armonizaxe cola cocina nikkei del chef limeñu Mario Verdes (restorán Ronda 14). Una degustación idegal pa Madrid Fusión na que xustamente fundiose la cocina mestiza peruana y xaponesa con “una bébora enfrescante, que lleva burbuya y que-y va perbién” manifestó’l xef.

sidre, sidra, sidro, cider, cidre, sagardoa, Apfelwein, Píngguǒ jiǔ, cidro, siideri, seidr, leann úll, Saidā, sider, jablečné víno, jabłecznik, sydr