Abiertu’l plazu pa la marca calidá ‘Sidreríes de Asturies’

Fasta’l próximu 31 de mayu les sidreríes asturianes podrán solicitar la incluxón en dichu sello de calidá

LA SIDRA.- Les ‘Sidreríes de Asturies’ tán concebíes para protexer y aumentar el potencial turísticu y hosteleru  de les  sidreríes estremando y poniendo en valor los establecimientos que cumplen  con unos requisitos específicos que garanticen la calidá de les sos instalaciones y serviciu, col echáu de la sidre como aspeutu fundamental.

Precisamente cola mirada puesta n’amontar el potencial de les sidreríes asturianes, fasta la medianueche del próximu 31 de mayu’l ‘Principado’ va caltener abiertu’l plazu por que los negocios que lo deseyen traten de xuncise a la marca de garantía ‘Sidreríes de Asturies; Calidá Natural’.

Como n’ocasiones previes, a esta elección van poder allegar aquelles persones físiques o xurídiques titulares de sidreríes, bien seya en calidá de chigres o de restoranes, que tean inscrites nel Rexistru d’Empreses y Actividaes Turístiques.

P’ aportar a l’autorización d’usu de la marca l’establecimientu tendrá de sometese a dos evaluaciones distintes y complementaries: una evaluación, notificada, d’instalaciones, equipamientu y xestión y una auditoría de serviciu, non notificada,  realizada por aciu’l métodu del “turista anónimu” o “veceru misteriosu”. Pa llograr una evaluación favorable ye necesario una resultancia satisfactoria en dambes auditoríes. Una vegada que l’establecimientu ta autorizáu a utilizar la marca, revísase’l cumplimientu de los requisitos por aciu la realización d’una auditoría añal, alternando una auditoría d’instalaciones y equipamientu con una de servicios.

De superar el procesu, va autorizase a faer usu de la placa específica nel esterior de los establecimientos y na promoción de los productos. El conxuntu resolveráse en trés meses dende’l zarru del plazu; de magar entós, van sabese los nomes de los negocios que se van incorporar a una llista que, anguañu, integren ventiseyes llocales