Asturies incrementa la so presencia en Madrid Fusión

El nuesu país cunta con más stands na zona esposiciones, asina como nuevos talleres y conferencies.

LA SIDRA.- Primer díi de Madrid Fusión y Asturies ta más presente que n’ediciones anteriores. Hai varios aspeutos que se caltienen y ye que dieren bonos resultaos polo que se consideró importante da-yos seguimientu.

El primer d’ellos, l’estand na puerte de la Feria Madrid na qu’un echaor especializáu –Jonathan Trabanco–, echa culinos de la nuesa sidre tradicional. ¿Qué marques son? Pues Trabanco, Cortina, Acebal y Menéndez xunto coles sos respeutives marques acoyíes a la DOP Sidre d’Asturies o Sidre de Mazana Seleicionao: Trabanco d’Escoyeta, Villacubera, El Carrascu, y Val d’Ornón; amás de la sidre ganaora esti añu nel Salón DOP, Prado y Pedregal del llagar La Morena.

Hai de destacar que nesti 2018 nesti puntu sidreru podemos atopar a dos organizaciones en cuentes d’una sola, como n’años enantes. La veterana Xixón de Sidre; y tamién la yá mencionada DOP Sidre d’Asturies.

Na tercer planta, na fastera d’esposición, pudiemos ver de nueu a Grupu El Gaitero con una amuesa de los sos productos,ente ellos la sidre de xelu 1898. Al igual qu’un espaciu llamásu Xixón Gastronómicu nel que se promocionen productos cerveceros Vör y la empresa Del Llar, de conserves d’alta cocina en frascos, ensin aditivos nin conservantes.

Una de les novedaes más importantes nesti alcuentru foi un stand del “Principado2. Por primer vegada nesta cume, el nuesu país cunta con un escaparate nel que se pudieren degustar bona parte de los productos acoyíos a la marca “Alimentos del Paraiso Natural” como son los quesos de Cabrales, Gamonéu, Casín, Afuega’l pitu y Beyos, el Choscu Tinéu y los chorizos asturianos, el vinu Cangas, la Sidre doen DOP, xunto con llambionaes como los carajitos, les marañueles y la marmiellada de kiwi ecolóxicu y miel, too ello cordinao pola Conseyería de Desendolcu Rural y Recursos Naturales. Demientres tola xornada de güei rializáronse estremaes tasties y degustaciones p’amosar l’alta calidá que presenta Asturies nestos productos.

Y pa finar el díi, Asturies tamién s’estrenó nel escenariu de la sala polivalente. El xef Sergio Rama y el periodista gastronómicu David Fernández-Prada de Gustatio ufrieron un showcooking nel que pudo comprobase la versatilidá de los Alimentos del Paraiso Natural adscritos a la IXP y a la DOP. Rama ellaboró el ca vegada más famosu cachopu con Xata Asturiana, claro está, rellenu de quesu Los Beyos y Choscu Tinéu, y tamién unes fabes con saramollete.

El martes continúen les tasties y degustaciones, asina como conferencies sobro la nuesa bébora tradicional qu’esta revista cubrirá y que podrán seguise nes nueses redes sociales.

https://www.facebook.com/lasidrainfo/

@revistalasidra