Cena a ciegues en Las 3 Andaricas

El restorán Las 3 Andaricas celebra una cena a ciegues maridada con estramaes tribes de sidre del llagar Viuda de Angelón y compuesta de cinco platos y trés postres.

LA SIDRA.- Les 3 Andaricas, reputáu restorán de Somao, Pravia, va rializar el prósimu 6 de xunetu una orixinal cena a ciegues, ello ye, nella vendaránse los güeyos a los comensales pa qu’aprecien de manera más nítido los saborgos.

La idega nació, como desplica Fernando, porque “una vegada fui a una tastia quesos y gustóme enforma y pensé en cómo podíemos treslladala a un menú degustación y d’ende surdió”. Na so tastia, primero van ufiertar, sobro les 20.30 hores, un cóctel d’afayamientu y unos aperitivos pa, escontra les 21.00 hores, sentar a los comensales a la mesa. Ende llega la parte más interesante, yá que, una vegada sentaos, “vendarémos-yos los güeyos pa faer una velada interactiva. Diré desplicándo-yos en qué consiste ca platu y en qué tendríen d’afitase al saborguialo, pa dempués dir entrugando y conocer qué saborgos sintieron con más potencia. Ye nidio que non toles presones tenemos el mesmu paladar y cauna pue percibir estremaos saborgos d’un mesmu platu, porque al nun ver lo que xinten, poténciense’l restu sentíos”, siñala Marqués.

El menú va tar compuestu de cinco platos, que van dir maridaos con estremaes sidres. De man, un buñuelu de vieira rellenu oricios y centollu con cruxente d’ocle, maridáu con sidre natural Prau Monga, la DOP de Viuda de Angelón. El segundu los platos ta compuestu de quesu Rey Silo a la parrilla con salmón marináu, migayes d’aceituna prieta y forgaxes de xamón, acompangu de la sidre Viuda de Angelón 1947. Van siguir con un bacalláu salteáu con pimientos y cogordes col que van sirvir un albariño brut, Etra. Darréu, van ufiertar un pulpu con patatines y la brut Prau Monga. Pa rematar la tastia, presa de gochu ibéricu con guarnición y, pa beber, sidre Pomar Rosada.

Como colofón a esta gran velada, los comensales van poder esfrutar d’una degustación de trés postres: una tarta quesu con mousse de tequila; un mousse de toffee, y un quesu frescu La Peñona con dulce artesanu y ecolóxicu d’arándanos, bien regáu toos con una sidre dulce casero de la zona. El preciu del menú, qu’inclúi los aperitivos y el cóctel d’afayamientu, ye de 50 euros per presona. Una oportunidá perfecha por que los amantes de la gastronomía puedan esfrutar en fondura y d’una miente estremada de la so pasión.

VER ARTÍCULU COMPLETU