Cider Cities n’Irlanda: aconceyamientu col alcalde, un llagar y un pumar de verdialona

Demientres la xornada d’ayeri, martes 25, l’alcalde de la ciudá de Cork recibió a  la representación de Cider Citiesnel so despachu

LA SIDRA.- Joe Carroll escuchó les propuestes de los asturianos, demostrando un fonderu interés nelles y alcordando vese nuevamente n’Asturies demientres l’Alcuentru de Ciudades Atlantiques, qu’esti añu va cellebrase en Xixón. La so disposicion foi mui positiva, comprometiéndose a entamar darréu a trabayar col conceyu de Cork pa seguir col procesu d’ingresar en Cider cities.

De tardi la delegación de les Ciudaes Europees de la Sidre – Cider Cities,  xunto con representantes del Llagar Stonewell, l’alcalde de la ciudá de Cork y representantes del Conceyu de Cork, desplazáronse hasta un espáciu públicu onde llantaron un pumar de verdialona –variedá integrada na DOP Sidre d’Asturies- procedente de viveros Cándamo, el primer pumar asturianu (que se sepa) llantáu n’Irlanda dende va sieglos.

Punxo’l ramu a la xornada una visita al llagar Stonewell onde tuvo llugar una interesante preba de sidres, tanto del propiu llagar comu de dellos de los participantes nel Salón Internacional de les Sidres de Gala, eventu al qu’asiste va un par d’años el llagar irlandés.

Galería de Semeyes