Clas maxistral sobro sidre nel Atenéu Obreru de Xixón

Sol títulu “¿Sidre asturiano o sidre d’Asturies?”, Marcos A. Fernandi protagonizó la conferencia mensual de Ástura.

LA SIDRA.- Ayeri la sidre foi la protagonista na charra que tuvo llugar nel Atenéu Obreru al cargu de Marcos Abel Fernándi Marqués, editor de la revista La Sidra y presidente de la Fundación Asturies XXI.

Tres la presentación al cargu de Amadéu Benavente, Marcos A. Fernández espunxo custiones rellatives a la sidre asturiano tales como si tien de ser considerada como tal la sidre fecho n’Asturies con mazanes d’otros países, la de xelu o namás la regulada pola DOP.

La llexislación nun establez los mesmos baremos pa considerar como asturiana tolos tipos de sidre ellaboraos nel país, como asocede con otres bébores como’l vinu. Y ello deriva en tracamundiu, llegando a considerase sidre l’axampanada pero non la de pera, con gran tradición hestórica.

Tamién s’espunxeron custiones como la ellaboración de la sidre asturiano por aciu dos formientadures, a diferencia de les d’otros países, y tratáronse los pros y los contras de la regulación llevada a cabu pola DOP “Sidre d’Asturies”, a la calificó como’l mayor avance de la sidre asturiano nos tiempos caberos.

Ente los primeres tópase’l fechu de la dinificación del productu pa poner en valor el nuesu territoriu y garantizar la supervivencia de les pumaraes, los pumareros y el paisaxe, lo cual traduzse n’economía identitaria.

Pero tamién ye contraproducente, dando llugar a un emprobecimiento xenéticu, el refugu de los llagareros ensin xuntar a la DOP y la perda de la marca “Asturies”, al nun poder utilizase símbolos nin nomenclatures acomuñaes a Asturies.

Tres la charra diose pasu a una tastia, al cargu’l especialista en sidres europees Eduardo Coto, de sidres alemanes, cheques, franceses, ingleses y asturianes.