Defendiendo la nuesa botella

L’ASA denuncia que l’envase utilízase por productores non asturianos, pesia qu’el colleutivu tienla rexistrada como marca.

LA SIDRA.- L’Asociación de Sidres d’Asturies -ASA- cellebró ayeri la so asamblea na Fundación mailiayesa José Cardín. Dientru los puntos que s’abordaron nel alcuentru fixose fincapié nel usu indebíu que se-y ta dando a la botella de sidra. Va tiempu qu’esta asociación rexistró l’envase como marca pa evitar qu’ellaboraores que nun fueren asturianos la utilizaren pa les sos bébores. Sicasí, señalaron, la botella de sidra, la llamada ‘molde fierro’ , utilízase y por esti motivu quien tomar midíes más series, incluyendo llevar esta situación a los tribunales.

Foi nel sieglu XIX, en plena dómina industrial, cuando la población n’Asturies doblóse. Tamién foi un periodu de tiempu nel que s’incrementó la emigración a América. Esto causó un aumentu na demanda de sidra. Fasta entós la forma de consumir la nuesa bébora tradicional yera n’espiches, en xarres o en zapiques. Foi escontra 1827 cuandu se fabricó la primer botella.

“Instalase n’El Natahoyo, en Xixón, un fornu que merca Ramón Toral destináu a tal efeutu  y qu’en 1829 pasa a Begoña. Darréu La Industria mércalu a mediadios de sieglu. La botella fai que la sidra consúmase en cualisquier dómina del añu y en cualisquier llugar y situación, colo que’l consumu dispárase. Cuasique  al empar, en La Industria, escomienza  a fabricar los primeros vasos de sidra, que nun principiu yeren gurdios,  de más de 400 gramos y varillaos. Tenía unos 500 ml de capacidá” desplicó Emilio Martínez na conferencia que dio nel Xardín Botánicu de Xixón “Evolución ya importancia de la producción de mazana de sidra en Asturies” a la qu’asistió esti mediu de comunicación.