Degustación de Roxmut nel MeNaX

El sábadu de 12:00 a 14:30 va tener llugar nel Mercáu Navidiegu del Paséu de Begoña de Xixón una preba del conocíu como’l vermú asturianu.

LA SIDRA.- Mañana va llevase a cabu nel Mercáu Navidiegu de Xixón una degustación de Roxmut, conocíu yá como’l vermú asturianu. La preba va llevase a cabu de 12:00 a les 14:30 nel stand de la revista LA SIDRA que s’atopa ente los primeros puestos istalaos al empiezu del Paséu de Begoña tomando como referencia Avenida de la Costa.

 Llagar Castañón presentó’l pasáu 18 de marzu esta novedosa bébora que, en tiempu récord, féxose con una gran aceptación por parte del públicu asturianu ya inclusive del Estáu español. “La clave ta na sidra: lleva un 80% de sidra natural de variedaes asturianes tipu DOP con acidez fixa alta que rescampla’l so frescor. Darréu ye calistrada y macerada con herbes como oriéganu, mananilla, ente otres. Estes apúrren-y toque balsámicos y herbales. Amás, el carambelu natural otorgar collor. Finalmente, dempués del so pasu per maera demientres tres meses, Roxmut llogra’l so carauterísticu collor ámbare, arredóndiense los amargos y toma los matices de fuste final tocantenes a collor y golor” desplicó Julián Castañón.

Otra de les bébores que podemos atopar pa tastiar nel MeNaX ye la sidre caldio. Esta preparación tamién se llama Filipu cuando va fervío con figos, o sidre aferronao cuando se calez con cachos de fierro en caldia metíos nel ñlíquidu. La sidre calecío que podemos tastiar ta ellaborada con una receta especial que lleva miel, canela, clavu y  estremaes especies. Asina que yá sabéis: “Al catarru da-y col xarru y si tá bien agarráu, toma sidre calentáu”.

Amás nesti mesmu stand, y siguiendo la tradición de los mercaos navidiegos de les principales capitales europees, esti añu puen atopase sidres de toa Europa. Munches d’elles participaron nel Salón Internacional de les Sidres de Gala –SISGA’16–, polo que provienen d’alredior de 10 países, amás de que tienen altos estándares de calidá. Esta feria istalóse’l 1 d’avientu nel paséu de Begoña y va durar fasta’l 6 de xineru n’horariu de 11:00 a 22:00 hores. 

Nel exhibidor y puntu vienta podemos atopar sidres de países como Alemaña, República Checa, Francia, Reinu Xuníu, Países Baxos, Bélxica, Italia, Suecia, Portugal; y de xacíu, de Asturies. Una oportunidá única p’alquirir estos productos que d’otra manera seríen imposibles d’atopar en cualesquier otru mercáu o eventu del territoriu español. Y una forma tamién, de conocer los distintos ya innovadores tipos qu’hai d’esta bébora y que se tán produciendo anguañu n’Europa.