Entamu LA SIDRA de Payares’21 (Nb. 211)

Entamu

Una bona anuncia pa toos. ¡Norabona!

Que por fin se presente la candidatura de la cultura asturiana de la sidre a la Unesco pa la so declaración como Padremuñu Inmaterial de la Humanidá, costitúi ensin dala dubia la más importante anuncia, non yá d’esti mes d’especial actividá sidrero, sinón de los postreros años, y la so trescendencia namás ye equiparable a la costitución de la DOP Sidre d’Asturies.

Con munchos años de retrasu, cuando otres candidatures que s’anunciaron al empar yá va años que completaron tol procesu y llograo esta reconocencia pola Unesco como padremuñu inmaterial de la humanidá, por fin consiguióse que l’Estáu español presente la candidatura asturiana énte la Unesco.

Fasta llegar a Madrid, la nuesa candidatura sumó incapacidaes, desinterés ya ineptitúes per parte del “Principaddo”, pero sobremanera cuntó col sofitu firme y entusiasta de la sociedá asturiana y el llabor silenciosu y costante de munches presones, ente les qu’ensin dubia hai de destacar la figura del hestoriador Luis Benito García, a cuya iniciativa, enfotu y trabayu debemos que güei veamos más cerca la reconocencia internacional de la nuesa cultura de la sidre.

Vaiga pos dende equí, el nuesu agradecimientu espresu a Luis Benito García y a toes aquelles presones que con elli collaboraron en dar esti importante pasu, qu’esperamos vease refrendáu pola Unesco bien llueu.

D’otra miente, ésti ta siendo un mes d’especial actividá nel mundiu la sidre, nel que tres la destacada presencia de la nuesa bébora patrio en Madrid Gourme,t asocedióse la cellebración n’Uviéu del International Cheese Festival, onde la Sidre d’Asturies consiguió un merecíu protagonismu, especialmente gracies a la rialización del Cider Lab, una rellumante iniciativa de la DOP Sidre d’Asturies, con gran ésitu.

Pero hai munchu más, el sidreturismu asturianu muévese, y yá hai 35 empreses venceyaes a esi “clú de productu”, la Cátedra de la Sidre d’Asturies algamó importantes oxetivos, y lo que ye más importante, la ‘collechona’ d’esti añu paez tar absorbiéndose de forma ordenao pelos llagares asturianos, tou un cúmulu de bones espeutatives.