Entamu LA SIDRA d’Ochobre ’21 (Nb. 210)

Entamu

Estupenda coincidencia la de la normalización del andanciu y l’empiezu de la collecha de mazana y la mayada. Ye como si se tratare d’un renacer, de la sidre, y de la vida.

Con esi espíritu enfusamos nesta seronda na qu’esperamos que lo mesmo qu’escomienza a faese la sidre nuevo, tamién recuperemos una vida nuevo dempués de tantu tiempu de llimitaciones. Ye’l momentu de recuperar el tiempu perdíu, de reincorporase pasu ente pasu a la normalidá.

Esti mes entamó cola cellebración del XI Salón Internacional de les Sidres de Gala, l’eventu que per unos díis pon a Xixón como capital mundial de la sidre, y que magar les llimitaciones impuestes pol andanciu, consiguió superase en númberu participantes y en cantidá de productos presentaos. Ye un lluxu pa la sidre, y ye un lluxu p’Asturies.

D’esti XI SISGA queremos destacar les pallabres de Marcos Fernández, presidente de la entidá entamaora, la Fundación Asturies XXI, al destacar el desendolcu y asentamientu de les nueves tribes de sidre, la internacionalización del productu superando aisllacionismos, y la ca vegada mayor interrellación del mundiu sidreru; y tamién cuando menta como problemes a superar el tracamundiu que xeneren les ‘ciders’, la falta d’una llexislación común europea de la sidre pa que fine la discriminación frente al vinu, y n’Asturies la urxencia d’un Plan Estratéxicu pa la sidre y la mazana, asina como una mayor implicación del “Principado” que, recordó, entá nun foi capaz de presentar la tan cacarexada candidatura de la cultura asturiana de la sidre énte la Unesco.

Nesti sen hai de recordar que’l seutor de la sidre asturiano nun recibió dengún tipu de sofitu específicu per parte del “Principado”, a diferencia del casu vascu onde’l so gobiernu lleva concedíes aídes por más de 60 millones d’euros a los sos llagareros, ya inclusive la Diputación de Gipuzkoa sacó aídes pa esti seutor.

Nestos intres de recuperanza ye más urxente que nunca la implicación de les Alministraciones, y nun ye de recibu que sigan desabriéndose de les sos obligaciones. Tienen que responder.