Adrián Pumares, secretariu xeneral de Foro Asturias y diputáu del Grupu Mixtu na Xunta Xeneral, denunció recién la venta de llagares tradicionales asturianos de sidre al traviés de plataformes en llinia. Esti fenómenu afecta a llagares con más d’un sieglu d’historia, que tán siendo comercializaos ensin que’l Gobiernu del ‘Principado’ tome midíes pa evitalo.
LA SIDRA.- Pumares calificó esta situación como una perda inreparable pa la identidá cultural, la historia y l’economía d’Asturies, y avisó de que munchos d’estos llagares podríen acabar como ellementos decorativos en chigres y restaurantes fuera d’Asturies, especialmente nel País Vascu.
El portavoz de Foro criticó la pasividá del Gobiernu asturianu, recordando que la cultura sidrera d’Asturies foi reconocía pola UNESCO como Padremuñu Cultural Inmaterial de la Humanidá, y sicasí nun se tán adoptando midíes efectives pa protexer los llagares históricos.
Midíes propuestes por Foro Asturias
Adrián Pumares propón un conxuntu d’actuaciones pa frenar esta deriva:
-
Aniciu d’un rexistru públicu de llagares tradicionales.
-
Concesión d’aídes económiques pa la conservación y modernización d’estos llagares.
-
Tramitación pa declarar los llagares centenarios como Bien d’Interés Cultural (BIC).
-
Puesta en marcha d’incentivos fiscales pa favorecer el so caltenimientu y tresmisión xeneracional.
Con estes propuestes, Pumares quier evitar que los llagares tradicionales acaben abandonando la so función orixinal y conviértanse n’un bien decorativu ensin raigañu nel territoriu.
