Gochu Asturcelta guisáu a la sidre

Tresna y envásalo ASTURSabor siguiendo una receta tradicional, ensin conservantes y llibre de gluten; amás hai de destacar que la carne cunta col sellu 100% Raza Autóctona y que la empresa ta amparada pola marca calidá Alimentos del Paraísu Natural

LA SIDRA.- “Son les recetes de mio güela, ellaboraciones tradicionales en tarros de cristal o en llata. Abres, caleces y comes. Nun lleven nin conservantes, nin gluten. Son naturales dafechu. Y cuando les prebes, saben a los guisos de tola vida, porque ye lo que son”. Asina define los sos productos Judith Naves Morán, fundadora de ASTURSabor, empresa que lleva nel mercáu cinco años.
Ente los sos productos ufierten Gochu Asturcelta guisáu a la sidre. D’esti hai de destacar que ta tresnáu siguiendo la receta de la güela de Judith, Fina, que lo cocinaba cola nuesa bébora más tradicional. “Asina lo cocinaba nel restorán dende va munchos años, lo que fiximos foi afaer un pocu la receta y puedo dicir que ye un de los platos estrella. Funciona de lluxu, de maravía y amás utilizamos sidre Alonso” desplica.

Tocántenes a la materia primo, dende la empresa siñalen: “los animales son criaos con lleche materno y n’estensivu nos campos asturianos. Comen raigaños y frutos de los árboles. La so carne tien grandes cantidaes d’Omega 3, un valor diferencial. La recuperación d’esta raza autóctona 100% asturiana llevóla a cabu l’Asociación de Criadores del Gochu Asturcelta (ACGA)”. Hai de señalar que tanto’l gochu como la Xata Asturiana de los Valles cunten col sellu 100% Raza Autóctona otorgáu pol Ministeriu d’Agricultura, Pesca y Alimentación.
Amás ASTURSabor ufierta platos como Potru Asturcón al Vinu cangas, Xata Asturiana de los Valles IGP, Xata Asturiana del Monte IGP guisada con cerveza, Caldereta de Corderu Xaldu con patatinos, Caldereta de Cabritu Bermeyu o Pitu Caleya.

Per otru llau, hai de destacar qu’esta empresa nun se dedica namás a la ellaboración y al envasáu. Ta presente en ca etapa del productu. Dende los sos entamos escomenzaron a criar, primero oveyes xaldes y agora tán con Xata Asturiana de Monte IGP. “Tolo facemos como d’antiguo, los animales tán en plena llibertá, nun usamos piensos, pastien y guardense en monte. Tol manexu ye tradicional” esplica Judith. Y tamién hai de dicir que cunten con serviciu de cáterin. “Tamos en toles llínies: primaria, secundaria y terciaria” conclúi la xoven empresaria.

Mercar gochu Asturcelta a la sidre