I Concursu de Sidre Casero en Salas

El prósimu sábadu 21 de setiembre Salas cellebrará’l so primer Concursu de sidre Casero

LA SIDRA.- Esti sábadu que vien, na Plaza la Ilesia de Salas, cellebraráse a les 12 del meudíi’l que sedrá’l I Concursu de Sidre Casero de Salas, nel que participarán un total de 13 llagares caseros del conceyu.

Como davezu, pa poder esfrutar d’esta sidre sedrá preciso mercar el correspuendiente vasu comemorativu, que por un preciu módicu permitirá prebar la sidre participante, too ello amenizao pola Banda Gaites de Salas.

Pero entá hai más, pela tardi tendrán llugar los Cancios de Chigre, que cuntarán cola participación d’Anabel Santiago, Alicia Villanueva y Eliseo Fidalgo, acompangaos a la gaita por Fran Pola. Les actuaciones tendrán llugar pola Confitería Gran Vía, Bar Príncipe, Sidrería El Molín, Casa Sueño, y Bar la campa.

Esti eventu, entamáu pola Asociación de Fomentu de la Sidre Tradicional y l’ayuntamientu Salas, cola collaboración de l’Asociación Salas en Marcha, cunta tamién col sofitu del Llagar El Buche y la Caxa Rural d’Asturies.

Pesia los tópicos provincianos que pretenden que la sidre nun se bebe nin produz nel ocidente asturianu, hai de remembrar que Salas ye un conceyu con una enorme tradición sidrera, y cunta con un padremuñu sidreru impresionante, con llagares de maera bien antiguos, destacando los de pesa y sobigañu.