IKEA rinde homenaxe a la mazana

La tienda sueca rializa una selmana d’actividaes teniendo como exa central el frutu asturianu y la sidre, mañana tendrá llugar el III Concursu Pinchu de Mazana

LA SIDRA.– Per décimu añu consecutivu, IKEA Asturies cellebra la Selmana de la Mazana que s’entama fasta’l 8 d’avientu. “Trátase d’una cita cultural al travies de la que la compañía desendolca estremaes actividaes col oxetivu de xunir la cultura sueca cola asturiana al traviés d’un productu común y rellevante pa dambes gastronomíes, la mazana” despliquen.

Na edición d’esti añu la tienda d’IKEA n’Asturies ispiróse n’estremaes tradiciones asturianes y sueques pa entamar una decena d’actividaes empobinaes a los estremaos públicos. D’esta miente, demientres tola selmana fadránse talleres, showcookings, degustaciones, música en direutu y actividaes infantiles, pa homenaxear una vuelta más la figura de la mazana y el so papel ca cauna de les cultures.

Les actividaes cuntarán cola participación de dellos de los representantes más sinificativos nel ámbetu de la gastronomía y l’arruelu asturianu, como’l profesor téunicu de Cocina y Pastelería Profesional del Principado d’Asturies, Rubén Díaz; la esconcursante asturiana de Masterchef Junior, Covadonga; o l’autora del blog “My Sweet Carrot Cake”, Reyes de Vicente.

Tami´ne tendrá llugar la III Edición del Concursu “Pinchu de Mazana”, una competición gastronómica dirixía a los aficionaos de la cocina. IKEA Asturies tuvo recibiendo estremaes recetes demientres los postreros díis, de tala miente que los cinco finalistes competirán el 5 d’avientu a les 17:00 hores mediante la rialización del so platu en direutu nel restorán de la primer planta d’IKEA Asturies, frente a los visitantes que quieran acompañalos. Los premios entregaránse en tarxetes de promoción d’ente 500 y 100 euros.