Esti ye’l impresionante premiu que la organización de la Primer Sidre l’Añu ufierta pa la Meyor Sidre Casero fecho en Maera, el concursu integráu nel propiu eventu que, añu tres añu, reconoz la meyor de les sidres d’elaboración casera feches siguiendo un de los métodos más tradicionales: la formentación y avieyamientu en toneles de maera. Una práctica cada vegada menos avezada, pero que sigue viva gracies a ellaboradores qu’apuesten por caltener esta forma de facer sidre, con tolo qu’implica de conocencia, paciencia y dificultá técnica. Trabayar cola maera esixe un control mui precisu del procesu, pero tamién apurre complexidá y personalidá al resultáu final, con matices organolépticos que difícilmente se llogren con otros sistemes d’ellaboración.
El premiu ta a l’altor del retu: una pipa de 225 litros de madera de carbayu rexeneráu procedente d’Italia, diseñada específicamente pa favorecer un avieyamientu óptimu de la sidre, apurriendo-y cadarma y complexidá aromática. Amás, ta equipada con tornón y portiella, un sistema que facilita enforma les llabores de llimpieza y caltenimientu al permitir abrir dafechu la barrica, daqué especialmente valorao por quien trabaya cola maera.
Trátase, en definitiva, d’una auténtica xoya de maera, un premiu tan simbólicu como útil pa un concursu que cada añu despierta l’interés d’ellaboradores de toa Asturies. Toos ellos competirán por facese con esta pipa nun concursu qu’edición tres edición sigue medrando tanto en númberu de participantes como en nivel de calidá, consolidándose como un de los momentos más esperaos de la Primer Sidre l’Añu y como un reconocimientu al saber facer de quien caltién viva la tradición de la sidre casero fecho en maera.
La cita ye la mañana’l domingu 5 de abril y los llagareros deberán aportar la selmana anterior seis botelles ensin etiqueta ni denguna señal que pueda identificar les botelles.
