La Cultura Asturiana de la Sidra entra nuna nueva fase de proyeición pública cuando se cumple’l primer aniversariu de la so inscripción pola UNESCO na Llista Representativa del Patrimoniu Cultural Inmaterial de la Humanidá. Un añu dempués d’aquel reconocimientu internacional, medra l’interés social y institucional alredor d’una tradición que representa ún de los grandes símbolos d’Asturies.
Nesti contestu, la Fundación Asturies XXI presentó la obra ¿Qué ye la Cultura Asturiana de la Sidra?, una publicación divulgativa concebida p’averar al públicu la historia, los rituales sociales, el papel de les pumarades, la identidá cultural y la proyeición de futuru del mundu sidreru. La espublización cunta col sofitu de la Conseyería de Cultura, Política Llingüística y Deporte.
La obra, con un marcáu calter visual y didácticu, quier convertise nuna ferramienta útil pa conocer meyor los valores que fixeron posible’l reconocimientu internacional de la UNESCO.
Dende la entidá promotora considérase que la efeméride tien de sirvir non solo pa celebrar, sinón tamién pa reforzar la protección y espardimientu d’esti patrimoniu vivu.
