La Feria Internacional de Muestres d’Asturies (FIDMA) torna esti añu con más puxu que nunca, y con un claru protagonista: la sidre. La 68ª edición, que va cellebrase del 2 al 17 d’agostu nel Recintu Ferial Luis Adaro de Xixón, dedica’l so estand principal a la cultura sidrera baxo’l lema: “Asturies ye sidrera. Lo nueso ye mundial”.
Col reconocimientu de la cultura sidrera asturiana como Padremuñu Cultural Inmaterial de la Humanidá pola UNESCO en 2024, el Gobiernu del ‘Principado’ apuesta por visibilizar y protexer un padremuñu únicu, con fondes raigaños nel pueblu asturianu.
Una esperiencia inmersiva al rodiu la sidre
L’estand institucional del ‘Principado’ tresformaráse nun montaxe inmersivu que recrea una pumarada tradicional, inclúi espacios sensoriales y proyecciones 3D, talleres d’echar sidre, tasties y zones artístiques dedicaes al mundiu sidreru. El proyeutu ta comisariáu por Luis Benito García, de la Cátedra de la Sidre de la Universidá d’Uviéu.
A lo llargo de los 16 díes de la FIDMA, esfrutaráse d’actividaes pa tolos públicos: dende xuegos interactivos pa neños, fasta foros técnicos sobre innovación y sostenibilidá nel sector sidreru.
Más de 2.200 marques y 720 expositores
Con una participación récor de más de 2.200 marques representaes y 720 espositores, la FIDMA 2025 cunta cola presencia d’ayuntamientos como Carreño y Villaviciosa, y prevese superar les 700.000 visites de les ediciones anteriores. Según la Cámara Comerciu de Xixón, la feria representa’l 0,6 % del PIB asturianuy supón la contratación de más de 6.500 moces y mozos pa trabayos temporales.
Un brinde pola tradición, la innovación y el futuru
La FIDMA convierte a la sidre nun emblema de país, amestando tradición, cultura, economía y turismu. L’aniciu de la Mesa de la Cultura Sidrera Asturiana, anunciada pa esti mesmu branu, refuerza’l compromisu institucional pa caltener y esparder la cultura sidrera dende Asturies pal mundiu.
