La Sidra d’Asturies, el maridaxe perfechu pal quesu

La Denominación d’Orixe Protexida Sidre d’Asturies apáutase  al International Cheese Festival y va cuntar col so propiu Cider LAB nel PEC

LA SIDRA.- Representantes del Asturies Paraísu Natural International Cheese Festival presentaron l’adhesión del Conseyu Regulador DOP Sidre d’Asturies al Festival. Allegaron al eventu’l presidente del Conseyu Guillermo Guisasola, la direutora xeneral de Desendolcu Rural ya Industries Agraries, Begoña López en representación del Principáu d’Asturies como principal sponsor.

L’oxetivu de les adhesiones ye implicar a los axentes socioeconómicos de la ciudá y d’Asturies pa la promoción del Festival y del seutor queseru asturianu. La sidre, nesti casu, ye un sellu asturianu emblemáticu, comenta la direutora del Institutu del Quesu, entamaores del Festival, Luisa Villegas: “Asturies tien delles singularidaes bien importantes y ente elles ta la gran propuesta que tien la DOP Sidre d’Asturies. Paezmos una gran propuesta, una y bones esta sidre, en toles sos versiones, ye tan equillibrada y elegante como pa poder maridase con tolos quesos del mundiu. Vamos trabayar intensamente por que’l primera maridaxe de tol Festival seya con Sidre d’Asturies Amás, paezmos una propuesta bien estremada y que tolos xueces nacionales ya internacionales van valorar de forma bien positiva. El públicu xeneral tamién va poder vivir esta esperiencia, porque tradicionalmente los maridaxes de los quesos fixéronse con vinos y sicasí, la sidre ye una gran propuesta. Amás, un país como Asturies, onde se trabayó tan esquisitamente la calidá d’esta sidre, pue apurrir una gran oportunidá experiencial pal públicu xeneral y pa tolos participantes profesionales que van venir a Uviéu”

La firma escenificada demientres la mañana cunta yá con unes llínies principales d’acción. La DOP Sidre d’Asturies va establecer un espaciu propiu dientru del Asturies Paraísu Natural International Cheese Festival en payares; el llamáu Cider LAB. Luisa Villegas lo presentó: “El Cider LAB ye un espaciu pa compartir y esfrutar de maridaxes escepcionales con compradores, prensa y xueces nacionales ya internacionales; ye un espaciu afayadizu pa trabayar con espertos en Quesu y Sidre”.

Amás, dambes organizaciones van trabayar en xunto pa desendolcar distintes acciones de promoción nos prósimos meses. Guillermo Guisasola, presidente del Conseyu Regulador de la DOP Sidre d’Asturies, mentó la importancia que tienen esti tipu de sinerxes pal conxuntu de productores asturianos y señaló la importancia del algame internacional que va tener el Festiva pa estos: “La Sidre d’Asturies ye un maridaxe perfechu pal quesu. Munchos sosprenderánse de la so harmonía. “

D’esta miente, DOP Sidre d’Asturies amiéstase al Asturies Paraísu Natural International Cheese Festival y el so Cider LAB conforma un nuevu amiestu al so programa de payares. Los entamaores indicaron qu’el mesmu programa completu y les entraes van tar disponibles prósimamente.