La sidre escontra la gota y les piedres de reñón

Un estudiu de la Xunta de Castiella y Llión desplica los beneficios de la nuesa bébora emblemática.    

LA SIDRE.- A puntu tán de terminar les fiestes y los escesos pásenmos factura. Los embutíos, el corderu y el mariscu nun son precisamente lo más recomendable pa les persones que carecen de tener alto l’índiz d’ácedu úricu. Y de les bébores, nin se diga. Según estremaos estudios, la cerveza y los llicores aumenten sensiblemente’l riesgu de sufrir un ataque de gota.

Sicasí, nun estudiu sobro sidre natural ellaboráu por un equipu de técnicos de la Xunta de Castiella y Llión refundió como concluxones que el bebedores de sidre son menos propensos a l’acumuladura d’ácedu úricu y “presenten una inmunidá cuasique xeneral escontra malures como la piedra y la gota”.

Sigún se desplica nel estudiu, l’ácedu málico conteníu na nuesa bébora tradicional ye un potente diuréticu qu’activa la función de los reñones y evita l’acumuladura d’ácedu úrico, polo que el bebedores de sidre tán menos espuestos a dolencies como la gota y les piedres de reñón. 

Y ye que tenemos que recordar que la sidre foi oxetivu de diversos estudios nos postreros años. Investigaciones rellacionaes col so consumu y la salú, y que yá fueron publicaes en feches anteriores. Por casu, el catedráticu de Cardioloxía de la Universidá d’Uviéu, Arturo Cortina, y el doctor avilesín Jesús Bernardo, autor del llibru Dieta del Cantábricu respuenden poles sos propiedaes pa la prevención d’enfermedaes cardiovasculares. Eso sí, detallen que’l consumu másimu recomendable por adultu nun tendría d’entepasar una botella al díi.