“La sidre ye familia”

Homenaxe a les Madres de la Sidra na presentación de la Primer Sidre l’Añu de Trabanco

LA SIDRA.- Un añu más Sidra Trabanco aprofita la presentación de la so sidre nuevo sobro la madre pa homenaxear a les muyeres de la sidra

Esti añu foron munchos los condicionantes que fixeron estremada la collecha y la so presentación: a un añu de muncha lluvia, cola recoyía de mazana mui espardío nel tiempu, que camudó los ritmos de maduración, xunióse una primavera atípica, na que motivos ayenos dafechu al mundiu de la sidre torgaron presentala cuando taba previsto. Sicasí, tan arguyosos –y con razón- del resultáu: una sidre afrutado y fresco qu’entra bien y sienta meyor, necesariamente d’edición llimitao poles sos propies carauterístiques.

Nel mesmu actu de presentación tuvo llugar la emotiva entrega de los premios  Madres de la Sidra 2020, que reconoz el –non siempres visibilizau-  llegáu y llabor de les muyeres nesti seutor: cocineres, chigreres, llagareres, echaores, muyeres que dedicaron la vida a la sidre, munches vegaes a la solombra del home, el fíu o l’hermanu.

Yolanda Trabanco, direutora de márketing en Sidre Trabanco, ye una d’elles, seique’l so papel en Trabanco ye bien visible. Ella foi la encargada de facer entrega de la placa commemorativa ya’l ramu flores a María Luisa García, de Casa Marisa; Graciela Nozal, de Sidrería Romy; Virtudes Izquierdo, de Sidrería Guaniquei; María José Coalla, de Sidrería Casa Fede; y Carmen Cerdeiro Dourado, de Sidrería Cabranes.

Especialmente emocionante foi la entrega del premiu honoríficu a Mónica Díaz, una muyer pa la que la sidre tuvo siempres presente, nos bonos y malos momentos, y que quinxo facer partícipe al llagar de la importancia que tien pa ella un culín de sidre Trabanco, la que compartía col so pa ya’l so home, fallecios en mui curtiu tiempu.

Tres del actu tuvo llugar la espicha, na que los presentes pudieron tastiar y valorar presonalmente la calidá de la Sidra sobre la Madre d’esti añu.

[ngg src=”galleries” ids=”46″ display=”basic_slideshow”]