L’amplia gama de les sidres europees

Na revista d’esti mes ufiertamos dellos exemplos de bébores ellaboraes con mazana proponiendo harmonizaxes con platos internacionales como’l chucrut, salmón con tzatziki o falafel

LA SIDRA.- La sidre ye una bébora con llarga y amplia trayeutoria na hestoria d’Europa. Magar ye ciertu que les esplumoses ocupen un nichu primordial en rexones como Bretaña o Frankfurt; o qu’esisten importantes cases ellaboradores en zones nel Reinu Xuníu que lu faen ser un de los países con más puxu nesti seutor; tamién ye verdá qu’adulces apréciase un resurdir de la sidre en llugares onde se perdiere la tradición de producila o taba en procesu de faelo. O inclusive nin siquier esistía.

Resurden o aníciense llagares nuevos, sí; pero tamién con idegues bien definíes sobro cómu se tien de desendolcar una empresa que tien a la mazana como la so exa principal. Inclúin, por casu, dientro de la so misión ya ideoloxía empresarial, el desendolcu de productos orgánicos, ecolóxicos, que respeten la flora y fauna llocal. Tamién apuesten firmemente por faer gala de la so tradición, poniendo énfasis nel so pasáu llabrador y l’importancia de recuperar esta triba de llabor pa xenerar un tipu d’economía col circuitu de prosimidá como oxetivu.

Na edición de xunetu de la revista LA SIDRA ufiertamos dellos exemplos d’esta sidres, proponiendo estremaos harmonizaxes con platos internacionales como’l chucrut, salmón con tzatziki falafel. Tamién damos les claves de la so preparación. Por casu, pal falafel: pa cuatro presones, dexamos mediu quilu garbanzos a remueyu la nuechi anterior. Al otru díi pónense nuna batedora –ensin cocer– con 2/3 de cebolla y trés serugues d’ayu picaos; media taza de perrexil y cilantru frescos y picaos tamién; dos cuyaraes de comín molíu, una cuyaraína sal y una taza d’agua. Entemezse too fasta llograr una testura trupa y dexamos reposar media hora. Cola masa vamos faer bolines del tamañu de croquetes y turriamos.