Los escolinos xixoneses cellebren el Díi de la Mazana

La Fundación Asturies XXI, cola collaboración de la Conseyería de Cultura, entama la primer edición de la cellebración escolar del Díi Internacional de la Mazana, una xornada educativa y participativa que busca averar a los escolinos xixoneses a la Cultura Asturiana de la Sidre

LA SIDRA – La propuesta tien un marcu netamente pedagóxicu, concebíu dende la idea de que la cultura y la tradición pueden ser vehículu d’aprendizaxe vivencial. A lo llargo la mañana, los neños y neñes van tomar parte en talleres y xuegos que los van poner en contactu direutu col procesu tradicional de la sidre y cola diversidá de la mazana asturiana. La esperiencia pretende fomentar la curiosidá, el aprendizaxe sensorial y el trabayu en grupu, ensin perder de vista’l valor que tien la mazana como alimentu saludable y como símbolu identitariu del país.

Baxo la supervisión de profesores y monitores especializaos, los grupos escolares van rotar por distintos espacios de trabayu, participando n’actividaes que van dende la sema de pebides y la mayada de mazana hasta’l prensáu de la sidre’l duernu y la práctica d’echar -con agua-. Tamién van realizase xuegos de relevos, prebes d’equilibriu y debuxos de variedaes de mazana, integrando asina l’aspectu físicu, artísticu y cultural nun mesmu programa d’aprendizaxe.

La xornada rematará cola preba de la sidre’l duernu recién ellaborada, un momentu compartíu que simboliza el trabayu colectivu y la participación activa de tolos escolares. La organización cuenta pa esta actividá cola esperiencia de los monitores del programa Sidrócoles, que lleva años tresmitiendo la cultura sidrera ente la mocedá asturiana, con talleres y mayada de mazana en colexos y folixes de toa Asturies.

La cita celebrarase’l próximu 21 d’ochobre, Díi Internacional de la Mazana, ente les nueve y media y la una y media del mediudíi, y cuntará cola participación de dellos colexos del conceyu.

Pente los escolinos participantes tarán los del Sanatoriu Marítimu, afondando asina na llabor d’inclusividá que la Fundación Asturies XXI lleva desendolcando va pocu más d’un añu, con talleres nos que participen en comuña persones con estremaes capacidaes físiques y cognitives.

Cola celebración d’esti Día Internacional de la Mazana, la Fundación Asturies XXI reafirma’l so compromisu col desendolcu d’una educación activa, inclusiva y venceyada al padremuñu cultural asturianu. La iniciativa busca, amás, reforzar les directrices de la UNESCO sobre la enseñanza de la Cultura Asturiana de la Sidra, reconocida como Bien Inmaterial de la Humanidá, al mesmu tiempu que promueve’l respetu pola tradición y pola diversidá cultural.