Nava va convertise ente’l xueves 10 y el domingu 13 de xunetu nel epicentru del universu sidreru, cola cellebración del so yá tradicional Festival de la Sidre, declaráu Fiesta d’Interés Turísticu Nacional nel añu 1989
LA SIDRA.- La programación escomienza en realidá’l martes 8 a les 18:00, cuando’l Llagar de Sorribes va acoyer la primer preselección del Concursu a la Meyor Sidra Natural Ellaborada n’Asturies y en Nava, empecipiando asina les pruebes que van llevar a les sidres que pasen los filtros previos fasta la gran final, un procesu llargo y minucioso nel que los xuraos asegúrense de caltener la fama d’imparcialidá y esixencia pola que ye conocíu esti concursu, ún de los más antiguos y reconocíos de los munchos que valoren les sidres asturianes ca añu.
Entá va ser necesaria otra preselección y una semifinal, que se van cellebrar igualmente nel Llagar de Sorribes enantes de decidir qué sidres van participar na gran final el sábadu díi 12.
Esi mesmu díi, el martes, va abrir les sos puertes nel Muséu de la Sidre d’Asturies, la esposición de les obres presentaes al Concursu de Cartelu Anunciador del Festival de la Sidre, que’l so ganador, obra de Jaume Gubiamas, esíbese yá non solo na publicidá del eventu sinón na fachada del edificiu que da a la Plaza Manuel Uría.
