La Sidrería Casa Vene, en La Felguera, acoyó ayeri la presentación del llibru, que recueye n’imáxenes y pallabres la cultura sidrera dende un puntu de vista poéticu ya intimista
Na presentación participaron Llucía Fernández Marqués, autora de los testos, el fotógrafu responsable de les imáxenes del llibru, Luis Vigil Escalera y Marcos Abel Fernández, editor de la revista LA SIDRA ya impulsor d’esti proyectu. Al actu acudieron tamién la diputada Esther Freile y la conceyala Angelita Cueva Fonseca.
Marcos Abel abrió les intervenciones resaltando la importancia del reconocimiento de Padremuñu Inmaterial pa la Cultura Asturiana de la Sidra, una cultura que se recueye nel llibru presentáu y que los y les asturianos vivimos diariamente cuasique ensin decatanos de la so fondura y de la so importancia.
Nel mesmu sen Llucía Fernández afaló a los presentes a somorguiase mentalmente nos sonidos , imáxenes y arumes d’una barra de sidrería, pa que tomaren conciencia de lo interiorizao que tenemos los xeitos y estímulos venceyaos a la sidre. Tres de desplicar el procesu de creación lliteraria que llevó a esti llibru, lleó dalgunos testos del mesmu y pasó la palabra a Luis Vigil, que non solo presentó “Toma un culín” sinon que, tres d’una alcordanza al so suegru –quien-y enseñó tolo que sabe de sidre- fexo un repasu n’imáxenes a la so hestoria como fotógrafu de la sidre, resaltando les nueves formes d’enfocar esta bebida dende’l so oxetivu.
