Siñalización del Muséu de la Sidre

Asturianistes por Nava espublizen un comunicáu denunciando que’l “Principado” nun incluyó la so siñalización pa l’A-64.

LA SIDRA.- Asturianistes por Nava –AxN-  fíxomos llegar un comunicáu que desplica la falta de siñalización del Muséu de la Sidre. Nésti espónse qu’el 12 de marzu de 2012 el plenu del Conceyu de Nava, presidíu entós por Emilio Ballesteros –de AxN– aprobaba a pidimientu del tamién daquella Cordinaor del Muséu de la Sidre, Elías Carrocera, una moción conxunta de los cuatro grupos que lu formaben naquel momentu –PP, PSOE, FAC y AxN–.  Solicitábase que na siñalización del nuevu enllaz cola autovía en Llieres figurara’l Muséu de la Sidre.

La moción foi cursada pol Conceyu de Nava y solicitóse a la Direición Xeneral de Turismu de Asturies pa qu’empecipiara los trámites, repitiendo en delles ocasiones la solicitú tantu telefónicamente como per escritu. “Vimos como nesi tiempu l’actual alcalde de Villaviciosa, entós daquella  voceru de turismu del PSOE na Xunta Xeneral, achacaba al Gobiernu d’España la falta de siñalización, versión qu’agora queda n’entedichu talo como abarruntábamos. L’actitú del gobiernu del PSOE d’Asturies pa cola cultura sidrera nun ye daqué nuevo; pudiemos ver cómo dexaron de llau la candidatura de la cultura de la sidre como Padremuñu Inmaterial de la Humanidá y abandonaron a la so suerte a un muséu que tien como misión salvaguardar esta cultura” siñalen nel comunicáu.

Apocayá salió a la lluz una noticia na que s’informa que “El Gobiernu central explica que’l “Principado” nun incluyó al muséu na acta roblada pa indicar los llugares d’interés”. Pa AxN esto ye “una mentira más, de tantes, que se cuntaron respeutu al muséu. Un equipamientu que por dalguna estraña razón, nun interesa que funcione, siquier pel momento, y pal que, según les últimes declaraciones de Juan Cañal, Presidente de la Fundación de la Sidra y Alcalde de Nava, hai planes de pseudo-privatización al traviés de Recrea o d’una empresa perteneciente al SEPI”. “Cuando la situación llevar a estremos insostenibles la privatización considérase salvación y ye vista pola opinión pública como daqué bono, ye una hestoria que se repite.  Quicías ‘esta solución’ seya l’oxetivu” conclúi’l partíu políticu.