La Fundación Asturies XXI en comuña cola Asociación Rey Pelayo y Gastrónomos del Yumay entamó un taller d’echar sidre pa persones con estremaes capacidaes intelectuales
La Sidrería Yumay acoyó ayeri un taller perespecial d’echar sidre, impartíu por Laura Ovín y al qu’acudieron una ventena llarga de participantes, de los que once yeren escolinos de l’Asociación Rey Pelayo, organización que trabaya por facer la vida más prestosa a les persones con discapacidá intelectual y les sos families.
La mayestra escanciadora Laura Ovín siguió el so sistema avezáu de talleres, entamando con una desplicación teórica pa pasar darréu a practicar con agua, corrixendo postures y dando recomendaciones, pa finar echando unes botelles de sidre y compartiendo los culinos.
“Agora si podemos decir que la Sidre ye Padremuñu de la humanidá, de tola humanidá” destacó Carlos Guardado, ún de los organizadores. Lo cierto ye qu’ente los participantes dellos destacaron pola so habilidá echando la sidre y otros pola so gracia y bon humor. En xeneral, foi un taller entreteníu y mui didácticu, nel que toos lo pasaron bien y la integración foi un fechu.
Tres del ésitu de la xornada, los organizadores ya tan pensando n’entamar más actividaes nesta llinia.
