XIII Salón Sidre d’Asturies DOP

Esti Salón ye un escaparate escelente pa la sidre asturiano y constitúi’l mayor puntu d’alcuentru de profesionales del sector sidreru, siendo imprescindible invitación pa l’asistencia al mesmu

LA SIDRA.- La Fábrica d’Armes de la Vega, n’Uviéu, va acoyer el martes 18 de xunu’l XIII Salon Sidre d’Asturies, entamáu pol Conseyu Regulador de la DOP Sidre d’Asturies.

Nesta ocasión decidióse cellebralu n’Uviéu, por ser la capital de la gastronomía española 2024, lo que s’espera que -y dea una mayor visibilidá a nivel internacional.

Nesti Salón los asistentes, previa invitación, van poder tastiar dende les 11.30 la mañana fasta les 14.00 y de les 17.00 a les  20.00 de la tarde les sidres de la postrer collecha DOP en toles sos variedaes, natural tradicional, calistrada y d’espolleta, procedentes de los 31 llagares certificaos que pertenecen a esta marca de calidá.

Con esti actu, amás d’amosar toles opciones de Sidra DOP disponibles anguañu nel mercáu, pretende ponese en valor la Denominación de Orixe Sidre d’Asturies, destacando la so calidá al traviés de los gallardones que distinguen les meyores sidres nes estremaes categoríes.

Llograr esa reconocencia ye perimportante pal productores, una y bones les sidres que seyan reconocíes nesti Salón como les meyores de ca categoría van proclamase institucionales fasta la cellebración de la siguiente edición del mesmu, protagonizando a lo llargo del añu distintos actos y representando a tola DOP.

Pero la importancia d’esti actu anicia especialmente nel  fechu de que xenera un importante puntu d’alcuentru pa los  profesionales del sector sidreru, nel que se creen contautos ente llagareros, productores, pumareros, distribuidores, hosteleros, prensa especializada, etc, yá qu’a elli puen asistir namás aquellos que cunten con una invitación personal acreditada.

El públicu xeneral podrá prebar toes estes sidres en sidreríes y restoranes, asina como en tolos actos abiertos al públicu que cellebra la DOP Sidre d’Asturies a lo llargo l’añu.