Tierra de quesu, la primer serie documental sobro ún de los productos más importantes d’Asturies

La road movie estrénase güei 24 de febreru a les 22:30 na TPA y cunta col cocineru Lluis Nel Estrada y el rializador Pablo Casanueva

LA SIDRA.- Güei 24 de febreru a les 22:30 empieza a emitise ‘Tierra de quesu’ na TPA. Trátase d’una serie documental centrada nel mundiu queseru asturianu. Una produición estilu road movie qu’afonda nes variedaes, la hestoria, y la ellaboración d’esti productu. Tamién de la vida de los so productores artesanos, lo mesmo que de les dificultaes a les que s’enfrenten. El rializador ribesellanu Pablo Casanueva, autor ente otres obres de ‘Bernabé’, ‘La sele construcción de la memoria´’ o ‘Escontra la casualidá’, dirixe esti proyeutu de cuatro capítulos, conducíu pol cocineru Lluis Nel Estrada.

“Esti espertu gastrónomu guía al propiu Casanueva, un mozu profanu nel mundiu los quesos asturianos, acullá de les nociones básiques de les que pue disponer cualisquier consumidor, al traviés de la xeografía asturiana, percorriendo dalgunes de les munches queseríes artesanales qu’ellaboren esti productu, ca vuelta más apreciáu pol consumidor, pero bien desconocíu” siñalen dende’l documental.

Tierra de quesu grabóse ente ochobre y payares de 2020, anque la idega llevaba dellos años maureciendo na mente de Casanueva y Estrada. “Asturies tien una de les produiciones queseres más importantes d’Europa y sicasí los asturianos conocemos poco más que’l Cabrales, el Gamonéu y l’Afuega’l Pitu”, desplica’l cineasta. “Tenemos una cultura quesera bien potente, con gran variedá y con llechi de muncha calidá, y sentimos la necesidá de treslladar a la sociedá una primer visión d’esti mundiu”, amiesta Estrada. La serie ta grabada íntegramente n’asturianu.