La Confradería del Oriciu cellebró esti pasáu sábadu en Xixón el so VIII Capítulu, una cita que tornó congregar a decenes de confraderíes gastronómiques nel marcu del Alcuentru Internacional de Confraderíes Enogastronómiques y que sirvió pa poner nuevamente en valor ún de los productos más representativos de la cocina mariñana asturiana. La xornada tuvo como escenariu principal el Muséu del Pueblu d’Asturies, onde se desarrollaron los actos institucionales d’esta hermandá gastronómica dedicada a la promoción del oriciu.
LA SIDRA.- El momentu central del actu foi’l nomamientu como Confrade d’Honor de José Ramón Fiaño -Presidente de Caja Gijón-, una distinción cola que la Confradería quinxo reconocer la so trayeutoria profesional y el so compromisu col texíu social y económicu d’Asturies. Nel actu solemne recibió los símbolos de la hermandá, incorporándose asina a una institución que trabaya pola defensa y divulgación del oriciu y de la cultura gastronómica vinculada al llitoral asturianu.
Xunto a esti reconocimientu, la Confradería rindió tamién un homenaxe especial a la sidrería Yumay, d’Avilés. Los sos responsables históricos, Justo y Lola, fueron distinguíos pola so llarga trayeutoria al frente d’esti emblemáticu establecimientu y pola so contribución a la promoción de la gastronomía tradicional asturiana. Con más de mediu sieglu d’historia, el Yumay convirtióse nun referente pa xeneraciones de gastrónomos, profesionales de la hostelería y amantes de la cocina del país, siendo amás escenariu habitual d’actividaes y alcuentros gastronómicos.
Amás d’estos reconocimientos principales, la Confradería del Oriciu fixo entrega de diversos diplomes de reconocimientu a persones y coleutivos venceyaos cola promoción del productu mariñán y de la gastronomía asturiana. Estes distinciones, avezaes nos capítulos de les confraderíes gastronómiques, busquen agradecer la collaboración y el sofitu d’instituciones, profesionales del sector y amigos de la hermandá que contribúin a dar visibilidá al oriciu y a la cultura culinaria del Cantábricu.
La xornada reunió en Xixón a representantes d’unes trenta o cuarenta confraderíes procedentes d’estremaos puntos d’España, Francia y Portugal, que participaron nos actos protocolarios y nel avezáu alcuentru de confraternización. La cellebración sirvió, amás, pa enfortiar los vínculos ente entidaes que comparten la defensa de los productos llocales y de la tradición gastronómica.
Cola celebración d’esti VIII Capítulu, la Confradería del Oriciu perafita’l so compromisu cola promoción d’esti apreciáu productu de la mar y cola difusión d’una gastronomía que forma parte esencial de la identidá cultural d’Asturies.
