La Casa del Vino de Tenerife convirtióse esta fin de selmana nun espaciu d’alcuentru alredior de la cultura sidrera cola cellebración del I Foru Canariu de la Sidre, una cita que tuvo como ún de los sos principales exes la participación y proyección de Cider Cities, iniciativa qu’impulsa la cooperación ente ciudaes y rexones productores de sidre y la valorización de la sidre como padremuñu cultural, gastronómicu y turísticu.
LA SIDRA.- El foru, qu’escomenzó’l 8 de mayu cola cellebración del Alcuentru del Proyeutu Raíces Atlántiques y continuó’l día 9 col alcuentru de productores de sidre de la Macaronesia (Canaries y Madeira) actividaes abiertes al públicu na Casa del Vino, sirvió pa reforzar la presencia de Canaries dientro de les redes internacionales venceyaes a les cultures sidreres atlántiques.
La presencia de Cider Cities permitió poner enriba la mesa la importancia de crear conexones ente territorios productores, favoreciendo l’intercambiu d’esperiencies alredior del turismu sidreru, la recuperación de paisaxes agrarios tradicionales, la gastronomía y la promoción internacional de les distintes cultures venceyaes a la sidre.
Dende’l foru destacóse especialmente’l potencial de Canaries pa incorporase a esa rede atlántica de territorios sidreros, aprovechando la singularidá climática y agrícola del archipiélagu y el xorrecimientu que ta viviendo la producción de sidre nes islles. El sector canariu cuenta anguañu con 13 llagares y una producción que supera les 2.400 tonelaes de mazana añales.
La xornada permitió amás analizar modelos de desendolcu sidreru d’otros territorios atlánticos, especialmente’l casu de Madeira y la so esperiencia cola IXP, vista polos productores canarios como una posible referencia p’avanzar na proteición y reconocencia de les producciones llocales.
La programación abierta al públicu desendolcóse ente les 11:00 y les 19:00 hores y combinó talleres, degustaciones y demostraciones gastronómiques concebíes como ferramientes pa divulgar la cultura sidrera canaria y les posibilidaes del productu llocal.
Ente les actividaes destacaron los talleres de “Sidres y quesos” y “Sidres y chocolate”, dedicaos a les posibilidaes d’harmonización ente les sidres canaries y productos artesanos del archipiélagu, asina como’l taller de mixoloxía sidrera impartíu por Edu Sánchez, d’ATTHEBAR, sobro les aplicaciones de la sidre na coctelería contemporánea.
Ún de los momentos centrales del foru foi’l cookshow “El brunch sidreru”, ellaboráu por Oliver Geyer y Diana Marcelino con productos llocales canarios y concebíu específicamente p’acompañar sidres de la Macaronesia, reforzando’l mensaxe defendíu por Cider Cities alredior de la unión ente gastronomía, territoriu y patrimoniu cultural.
La xornada preslló con “Local street food”, una nueva demostración gastronómica orientada a amosar les posibilidaes de la sidre canarioen formatos contemporáneos y nuevos espacios de consumu.
El I Foro Canariu de la Sidre confirmó asina’l momentu d’espansión que vive’l sector nes islles y la voluntá de los productores de conectar Canaries coles principales redes internacionales de territorios sidreros. La participación de Cider Cities reforzó precisamente esa dimensión internacional y abrió nueves víes de cooperación cultural, turística y gastronómica ente rexones atlántiques venceyaes históricamente a la producción de sidre.
