Seoane impúnxose nuna edición de gran nivel na que la dellegación gallega tuvo formada tamién por Héctor Lomba Villa, Ismael García del Río y Antón Franco. Per parte d’Asturies participaron Nel Cortizo Verdejo, Pelayo Cordero Vega, Diego Lobo Tuñón y Pelayo Suárez Rodríguez.
El MacCrimmon plantega a los concursantes un desafíu que va acullallá de la interpretación de los repertorios propios. Ca articipante tien d’interpretar pieces pertenecientes a les tres tradiciones musicales representaes nel xuráu: la bretona, l’asturiana y la gallega. La prueba valora asina non solo la calidá técnica, sinón tamién la versatilidá, la espresividá y la capacidá p’atalantar les particularidaes de la gaita nos distintos territorios del arcu atlánticu.
Esti formatu esixente fai d’esti concursu un escaparate privilexáu pa apreciar les semeyances y diferencies ente repertorios que comparten raigaños comunes, pero que desarrollaron formes interpretatives, ornamentaciones y sonoridaes propies. Los gaiteros tienen de demostrar una conocencia fondera del instrumentu y la capacidá d’adautase a llinguaxes musicales diferentes ensin perder precisión nin personalidá.
La victoria de Manuel Seoane Sánchez torna’l galardón a Galiza dientro d’un palmarés domináu hestóricamente polos intérpretes asturianos. Los representantes d’Asturies vencieron en 25 de les 39 ediciones celebraes hasta agora, un datu que reflexa’l pesu de la escuela asturiana de gaita dientro d’esta competición.
L’historial del MacCrimmon inclúi tamién dos victories femenines. La primera llegó en 2010 de la mano de la gaitera asturiana Andrea Joglar, que recibió amás una medaya d’honor en reconocencia al so llogru. Nueve años dempués, María López convirtióse na primera gallega en conquistar el troféu y, con namái 14 años, na concursante más moza en ganalu. Hasta entós, el récord pertenecía a Diego Pangua, vencedor nel añu 2000 con 16 años.
La programación del festival venceyada a la gaita va siguir el miércoles 5 d’agostu con una clase maxistral impartida por Diego Lobo Tuñón. El músicu asturianu, director de la Banda de Gaites El Gumial de Morea y de la Banda de Gaites Saxum de Xixón, conoz bien les esixencies del concursu, yá que se fexo col Troféu MacCrimmon en 2024.
La so sesión va averar al públicu y a otros intérpretes destremaos aspeutos téunicos y espresivos del instrumentu, al empar que va allargar l’intercambiu ente les tradiciones gaiteres de Bretaña, Asturies y Galiza. Dos años dempués de la victoria asturiana de Diego Lobo Tuñón, Manuel Seoane Sánchez inscribe agora’l so nome nun palmarés que sigue amosando la vitalidá de la música tradicional atlántica.
