Sidres de Madeira nuna semeya d’archivu de 2023. Fonte: archivu de LA SIDRA.
La isla atlántica consiguió nueve distinciones nel SISGA’26 y acaba de solicitar l’ingresu en Cider Cities, nun momentu de proyección internacional d’una producción que cuenta cola Indicación Xeográfica Protexida «Sidra da Madeira».
La sidre de Madeira volvió demostrar nel Salón Internacional de les Sidres de Gala que tien una personalidá propia y muncho qu’apurrir al panorama sidreru internacional. La representación madeirense zarró la edición con cinco medayes de plata y cuatro de bronce, repartíes ente sidres de copa, espumoses y una elaboración de pera. Unos resultaos que visibilicen la diversidá del trabayu de los sos productores.
Nueve distinciones pa la sidre de Madeira
Na categoría de sidre de copa seco consiguieron plata Tres Reis Magos Sidra da Madeira IGP, Sidra A Bragada y Sidra do Vares Sidra da Madeira IGP, esta última de la collecha de 2024. Nesta mesma categoría, la Sidra da Madeira IGP presentada pola Asociación de Productores de Sidra de la Rexón Autónoma de Madeira —APSRAM— recibió un bronce. Casa do Caramanchão sumó otru bronce con Boneca de Canudo, en sidre de copa semiseco.
Quinta da Moscadinha aconceyó cuatro galardones: plata pa Tres Barricas, espumosa de carbónicu natural brut nature, y pa Sparkling Natural, de carbónicu natural semiseco; y bronce pa TN, tamién brut nature, y Altitude, na categoría de perea semiseco.
Cider Cities y la IGP Sidra da Madeira
Esta presencia nel SISGA coincide con un pasu relevante nes rellaciones internacionales del territoriu: Madeira acaba de solicitar l’ingresu en Cider Cities, la rede de ciudaes y territorios venceyaos a la cultura de la mazana y la sidre. La solicitú abre una vía pa reforzar los intercambios con otres zones productores y desenvolver collaboraciones alredor de la cultura sidrera, la promoción y el sidraturismo.
Madeira cuenta, amás, con una ferramienta específica pa protexer la identidá de la so producción. La denominación «Sidra da Madeira» quedó inscrita como Indicación Xeográfica Protexida nel rexistru de la Unión Europea mediante’l reglamentu aprobáu’l 16 d’agostu de 2023. Esti reconocimientu ampara una elaboración estrechamente venceyada al so territoriu.
El pliegu de condiciones establez que la sidre protexío ellabórase formientando’l zusmiu natural de mazanes cultivaes na isla, que pueden amestase con peres tamién locales. Tanto la producción de la fruta como la ellaboración y l’envasáu tienen llugar en Madeira. La combinación de variedaes y les condiciones del suelu y del clima dan-y una acidez característica, frescura y una marcada presencia de la fruta nel aroma y nel sabor.
Detrás d’esta producción hai un padremuñu agrícola y cultural de sieglos. La documentación de la IGP recueye referencies al «vinu de mazana» dende’l sieglu XV y describe cómo les comunidaes rurales fueron seleccionando y compartiendo les variedaes meyor adaptaes a cada zona. Les pumaraes, los conocimientos d’ellaboración y les fiestes locales formen parte d’esa continuidá.
Los reconocimientos del SISGA dan visibilidá a esi trabayu. La solicitú a Cider Cities plantega agora la posibilidá d’estender les rellaciones ente territorios que comparten un mesmu retu: convertir la singularidá de la so cultura sidrera n’oportunidaes pa les persones que la caltienen viva.
