La presencia asturiana nel Festival Intercélticu de Lorient —An Oriant— nun se llenda a los escenarios. Xuntu a músicos, baillarinos, cineastes y artistes plásticos, el Gobiernu del Principáu caltién un espaciu istitucional dende’l que presenta Asturies al públicu francés comu un destín con identidá propio. L’estand axunta información turística en francés sobro cultura, gastronomía, sidre, paisaxes y formes caltenibles de viaxar, camentada pa quien escubre’l país demientres estos díes y quier facer d’esi primer contautu una visita futura.
La participación istitucional alquier un significáu especial en 2026. Cúmplense cuarenta años de la primer presencia oficial del Principáu en Lorient, entamada en 1986, y la dellegación asturiana d’esti añu algama unes 150 presones. Demientres el festival, que s’allarga fasta’l 9 d’agostu, la representación amesta música y baille tradicional con cine, artes visuales y creación contemporánea. L’estand turísticu completa esa programación y permite conocer el tarrén arriendes de lo que se ve y s’escucha nes cais y nos escenarios d’An Oriant.
Poro, los materiales disponibles permiten averase a Asturies al traviés de los sos conceyos, la costa, les montañes, les villes marineres, el padremuñu prerrománicu, el Camín de Santiago y una rede de pueblos y espacios rurales qu’ufierten alternatives a los percorríos más conocíos. El portal web oficial de Turismu d’Asturies dispón amás d’una versión afayaíza en francés, con propuestes de naturaleza, cultura, gastronomía, turismu rural, rutes, aloxamientu y formes de desplazase pel territoriu.
La gastronomía ocupa una parte importante d’esta promoción. La cocina asturiana preséntase comu una realidá fonderamente venceyada al paisax y a la produción llocal, dende los quesos y los productos de la mar fasta les carnes, la güerta, los postres tradicionales y, por supuestu, la sidra.
Tres la declaración de la cultura sidrera asturiana comu Padremuñu Cultural Inmaterial de la Humanidá pola Unesco n’avientu de 2024, el Principáu reforció la so promoción comu esperiencia cultural y turística.
La información qu’equí s’afaya desplica al visitante francés que la sidra asturiana nun ye namái una bebida, sinón una práutica social y cultural con vocabulariu, xestos, espacios y cellebraciones propios de so.
Lorient resulta un escenariu bien afayaízu pa esti mensaxe. Bretaña y Asturies comparten cultures sidreres bien arraigonaes, sicasí con métodos d’ellaboración, formes de consumu y tradiciones destremaes. El festival fai por presentar estes particularidaes ante un públicu que yá conoz el mundiu la mazana y que pue atalantar bien aína’l valir cultural del llagar, la espicha o l’escanciáu.
Los paisaxes formen otru de los exes principales del estand. La promoción combina la mar y la montaña, pero procura dir acullá de les imáxenes más repitíes. La costa occidental, los valles mineros, los montes del interior, les Reserves de la Biosfera, les rutes de media montaña y les aldees, perdayuri ufierten posibilidaes pa organizar viaxes más llargos y repartíos per distintes zones del territoriu.
Asturies cunta con siete Reserves de la Biosfera y con espacios protexíos como los Picos d’Europa, Somiéu, Redes, Ponga, Les Ubiñes-La Mesa o Fuentes del Narcea, Degaña ya Ibias. La ufierta turística combina senderismu, ñatura, padremuñu etnográficu y turismu rural cola conocencia d’actividaes tradicionales que siguen formando parte de la vida d’anguañu de munchos pueblos.
Esti plantegamientu encaxa bien con un públicu qu’aporta a Lorient atrayíu poles cultures celtes y atlántiques, la música tradicional, les llingües propies y los paisaxes venceyaos a la mar. La información turístico atopa asina un contestu favoratible: quien siente una gaita asturiana, siente a los artistes falar n’asturianu o contempla una actuación de baille pue interesase dempués pol llugar d’aniciu del grupu, les sos folixes, los sos pueblos y los espacios onde estes tradiciones caltiénense vives.
La visita de la conseyera de Cultura, Política Llingüística y Deporte, Vanessa Gutiérrez, al estand del Principáu solliñó la rellación ente la programación artístico y la proyeición istitucional. L’axenda asturiana en Lorient inclúi amás alcuentros con representantes bretones y córnicos, dientru d’una edición na que Cornualles s’asitia nel papel protagonista. Turismu, cultura y rellaciones istitucionales formen asina parte d’una mesma presencia nel esterior.
Tres cuatro décades de participación oficial, Asturies perafita la so presencia: les actuaciones amuesen una cultura xorreciente, mentantu que l’estand amiesta’l contestu y abre caminos pa conocela nel so propiu tarrén.
An Oriant furrula tamién comu puerte d’entrada a Asturies, col envís de que la curiosidá por una gaita, un baille, un paisaxe o un vasu de sidra fine por convertise nun viax.
